ABŞ-də bir sentlik sikkələrin zərbi dayandırılıb

ABŞ 200 ildən çox davam edən zərb tarixindən sonra bir sentlik sikkələrin ("penni"lərin) istehsalını dayandırıb. Bu qərarın arxasında yatan səbəb tamamilə iqtisadi xarakter daşıyır. Sikkələrin istehsal dəyəri nominal dəyərini xeyli üstələyirdi. Belə ki, bir "penni"nin istehsalı dövlət büdcəsinə 4 sentə başa gəlirdi. Bu addım ABŞ administrasiyasına büdcədə əhəmiyyətli qənaətlər etməyə kömək edəcək.

Bu məlumat Associated Press agentliyi tərəfindən yayılıb. Məlumata görə, sonuncu "penni"lər Filadelfiya ştatındakı "Moned" zərbxanasında istehsal edilib. Bir sentlik sikkələrin zərbinə ilk dəfə 1793-cü ildə başlanılmışdı. Ölkənin valyuta sistemindəki dəyişikliklərdən danışarkən, ABŞ-də dövriyyədən çıxarılan ən sonuncu sikkə 1857-ci ildə buraxılışı dayandırılan "yarım sent" olmuşdu.

ABŞ Prezidenti Donald Tramp 2025-ci ilin fevralında Maliyyə Nazirliyinə bir sentlik sikkələrin istehsalını dayandırmaq göstərişi vermişdi. Administrasiyanın hesablamaları göstərir ki, bu qərar sayəsində ildə 56 milyon dollar qənaət etmək mümkün olacaq. Əlavə olaraq bildirilir ki, istehsal dayandırılsa da, bir sentlik sikkələr nağd ödənişlərdə istifadə olunmağa davam edəcək. Həmçinin, zərb edilən sonuncu bir neçə sikkə isə kolleksiyaçılar üçün hərraca çıxarılacaq.