ABŞ-də həkim gizli şəkildə xəstələri izlədiyinə görə həbs edilib

ABŞ-ın Miçiqan ştatında çalışan həkim pasiyentlərə qarşı seksual zorakılıq etdiyi və gizli müşahidə apardığı üçün ağır cəzaya məhkum edilib. 42 yaşlı Umayr Ejjaz 35 ildən 60 ilədək həbs cəzasına məhkum edildi. Onun barəsində cinayət işi 2024-cü ildə açılıb. İşin başlanmasına səbəb həkimin öz həyat yoldaşının polisə təqdim etdiyi şok edici video materiallar oldu. Bu sübutlar Ejjazın gizli şəkildə çəkiliş apardığını təsdiqləyirdi.

İstintaq materiallarına görə, qeyri-qanuni çəkilişlərdə həkimin həyat yoldaşı, övladları və digər qadın qohumları əks olunmuşdu. Bundan başqa, araşdırmalar Umayr Ejjazın xəstəxana palatalarında da gizli kameralar quraşdırdığını üzə çıxardı. Həkim bu hərəkətlərlə pasiyentlərin şəxsi həyat toxunulmazlığını pozdu və öz peşəkar mövqeyindən sui-istifadə etdi. Yuxarıda sadalanan ittihamlardan əlavə, bir neçə xəstə də Ejjaza qarşı məhkəmədə iddia qaldırdı. Onlar həkimin xəstəxanada zorakılıq törətdiyini bildirdilər.

Bu cəza qərarı ictimaiyyət tərəfindən müsbət qarşılanıb. Oakland dairəsinin şerifi Maykl Buşar hakim Andersonun hökmünü alqışladığını söylədi. Şerif bildirib: "Hakim Andersonun hökmünü və prokurorun bu xəstə insanı tam məsuliyyətə cəlb etmək səylərini alqışlayıram". Hətta bu ağır hökm çıxarılsa da, Umayr Ejjaz işi üzrə cinayət istintaqı hələ də davam edir.