ABŞ-də hərbi təyyarə qəzaya uğrayıb

ABŞ Hərbi Hava Qüvvələrinə məxsus təlim təyyarəsi Oklahoma ştatında qəzaya uğrayıb. Hadisə təlim uçuşu zamanı baş verib. Qəzaya uğrayan təyyarə "OA-1K Skyraider II" markalı idi.

Ştatın Milli Qvardiyasının yaydığı məlumata görə, qəza Uill Rocers aerodromunda yerləşən 492-ci xüsusi əməliyyatlar qanadına məxsus təyyarə ilə baş verib. Təyyarə qəzaya uğrayanda onun göyərtəsində iki nəfər heyət üzvü vardı. Bu şəxslərdən biri mülki podratçı, digəri isə ABŞ Hərbi Hava Qüvvələrinin hərbi qulluqçusu idi.

Açıqlamada həmçinin xüsusi olaraq qeyd olunur ki, qəzaya uğrayan təyyarə və onun heyət üzvləri Oklahoma Milli Qvardiyasına aid deyil. Onlar federal hərbi qüvvələrin bir hissəsi idilər. Hadisə nəticəsində xəsarət alanlar barədə hələ ki, heç bir məlumat verilməyib. Rəsmi qurumlar qəzanın səbəblərini öyrənmək üçün araşdırmalara başlayıb.