ABŞ Ədliyyə Nazirliyi Trampın imzalarına görə əfv fərmanlarını yenidən dərc edib

ABŞ Ədliyyə Nazirliyi əvvəllər dərc edilmiş prezident əfv fərmanlarını öz saytında yeniləri ilə əvəzləyib. Bu addım sənədlərdə Prezident Donald Trampın imzalarının tamamilə eyni görünməsi səbəbindən atılıb. Məsələ ictimailəşdikdən sonra Tramp administrasiyası artıq dərc olunmuş fərmanları yeniləri ilə əvəzləməyi qərara aldı. Söhbət məhz 7 noyabr tarixli əfv sənədlərindən gedir.

Bu məsələ sosial şəbəkə istifadəçilərinin diqqətini çəkmişdi, onlar Trampın bir sıra sənədlərdəki avtoqraflarının eyniliyinə şübhə etmişdilər. Xüsusi sorğu aparan sənəd ekspertləri də bəzi imzaların həqiqətən eyni olduğunu təsdiqləyiblər. Ədliyyə Nazirliyi sonradan bu vəziyyətə aydınlıq gətirib. Nazirlik bildirib ki, Ağ Evin rəhbəri hər bir fərmanı şəxsən imzalayıb. Onlar təkrar dərc olunmanı sadəcə texniki nasazlıqla izah ediblər.

Hadisə fonunda Trampın sələfi Co Baydenə qarşı irəli sürdüyü əvvəlki iddialar xatırlandı. Tramp dəfələrlə demişdi ki, dövlət başçısı postunda Bayden sənədləri özü imzalamayıb, onun ətrafı avtomatik imza qurğusundan istifadə edib. O həmçinin qeyd etmişdi ki, Baydenin təxminən 2,5 min nəfərə, o cümlədən öz qohumları üçün imzaladığı əfv fərmanları hüquqi qüvvəyə malik deyil. Trampa görə, bu sənədlər keçmiş prezidentin xəbəri olmadan imzalanmışdı.