ABŞ G20-də iştirak etməyəcək

ABŞ Prezidenti Donald Tramp Cənubi Afrikada keçirilməsi planlaşdırılan G20 sammitinin “tamamilə rüsvayçılıq” olduğunu bildirərək, ölkəsinin bu tədbirdə iştirak etməyəcəyini açıqlayıb. Tramp bəyanatını “Truth” sosial şəbəkəsində paylaşıb. Boykot qərarının əsas səbəbi Cənubi Afrikada afrikanerlərə qarşı davam edən zorakılıq və insan haqlarının pozulması hallarıdır. Prezident Tramp qeyd edib ki, bu cür şəraitdə heç bir Amerika hökumət rəsmisi sammitə qatılmayacaq.

O, niderlandlı köçkünlərin, habelə fransız və alman immiqrantlarının nəslindən olan afrikanerlərin öldürüldüyünü vurğulayıb. Bundan əlavə, onların torpaqları və fermaları qanunsuz yollarla müsadirə edilir. Tramp bildirir ki, Birləşmiş Ştatlar bu hadisələrə biganə qala bilməz. ABŞ hökuməti Cənubi Afrikada baş verən hadisələri pisləyir və insan ləyaqətinə hörmət olunmasını tələb edir. Bu səbəbdən, hüquq pozuntuları davam etdiyi müddətcə ABŞ rəsmilərinin iştirakı mümkün deyil.

Qeyd edək ki, G20 tədbiri 22-23 noyabr tarixlərində Yohannesburq şəhərində keçiriləcək. Tramp Cənubi Afrika sammitini tənqid etsə də, ABŞ-ın gələcəkdə G20-yə ev sahibliyi etməsini səbirsizliklə gözlədiyini əlavə edib. Növbəti dəfə G20 sammiti 2026-cı ildə Florida ştatının Mayami şəhərində baş tutacaq.