ABŞ müdafiə naziri Hind-Sakit okean regionuna səfər edəcək

ABŞ Müdafiə Naziri Pit Heqset bu həftə Hind-Sakit okean regionuna səfər etməyi planlaşdırır. Bu səfər ABŞ Müdafiə Nazirliyi tərəfindən rəsmən elan edilib.

Səfər çərçivəsində Pentaqon rəhbərinin əsas diqqəti ABŞ-nin bölgəyə strateji marağının artırılmasına yönələcək. Heqset Havay, Yaponiya, Malayziya, Vyetnam və Cənubi Koreyaya baş çəkməyi nəzərdə tutur. Görüşlərin əsas mövzuları arasında müttəfiq ölkələrin müdafiə xərclərinin yüksəldilməsi və kollektiv müdafiə sahəsində əməkdaşlığın gücləndirilməsi yer alır.

Nazirin səfər proqramına əsasən, o, Havayda ABŞ-nin Hind-Sakit okean Komandanlığının rəhbərləri ilə görüşlər keçirəcək. Bundan əlavə, Pit Heqsetin Malayziyada təşkil olunan ASEAN Müdafiə Nazirlərinin görüşündə iştirak etməsi planlaşdırılır. Bu görüşlər ABŞ-ın regional təhlükəsizlik və tərəfdaşlıq strategiyasını irəli aparmasına xidmət edir.