ABŞ-nin energetika naziri: Nüvə sınaqlarımız subkritik olacaq

ABŞ nüvə silahı sınaqlarının bir hissəsi olaraq zəncirvari nüvə reaksiyası yaratmayan subkritik partlayışlar həyata keçirmək niyyətindədir. Bu barədə ABŞ-nin Energetika Nazirliyinin rəhbəri Kris Rayt "Fox News"a müsahibəsində bildirib.

Rayt qeyd edib ki, bəhs edilən sınaqlar test sınaqlarıdır. O, bunları birbaşa nüvə partlayışları saymır. Nazir onları subkritik partlayışlar kimi izah edib. Bu testlərin aparılmasında məqsəd nüvə silahının bütün digər hissələrinin düzgün həndəsə yaratdığına və nəticədə nüvə partlayışına səbəb ola biləcəyinə əmin olmaqdır.

ABŞ-nin bu sınaqları bərpa etməsi, ölkə Prezidenti Donald Trampın əvvəlki göstərişi ilə əlaqədardır. Prezident Tramp daha əvvəl Pentaqona nüvə silahı sınaqlarını dərhal bərpa etməyi tapşırdığını açıqlamışdı.