ABŞ-nin NATO-dakı nümayəndəsi: Ukrayna tezliklə 2 milyard dollarlıq silah alacaq

Ukrayna yaxın aylarda yeni hərbi yardım öhdəliklərinin bir hissəsi olaraq təxminən 2 milyard dollarlıq silah alacaq. Bu məlumatı ABŞ-nin NATO-dakı daimi nümayəndəsi Metyu Uiteker "Bloomberg TV"yə müsahibəsində açıqlayıb. O qeyd edib ki, Birləşmiş Ştatlar yardım öhdəliklərinin artırıldığı yeni bir sistem yaradıb. Ukrayna üçün nəzərdə tutulan bu vəsaitlərin tezliklə göndərilməsi gözlənilir.

Nümayəndənin sözlərinə görə, yaxın bir neçə ayda 2 milyard dollar və ya daha çox pul göndərilə bilər. Uiteker bildirib ki, prosesin tezliklə baş verməsi planlaşdırılır. Dekabrın əvvəlində xarici işlər nazirlərinin görüşü keçiriləcək və çox güman ki, bu yardım paketinə yekun vuracaq.

M.Uiteker 2026-cı ilə dair də planları dilə gətirib. O vurğulayıb ki, həmin dövrdə əsas məsələ Ukraynaya dəstəyin davamlılığı olacaq. Həmçinin, Ukraynanın özünümüdafiə üçün çox ehtiyac duyduğu silahların alınması üçün 12-15 milyard dollar məsələsi qaldırılacaq. Bu alınacaq silahlar Amerika silahları olacaq, deyə o əlavə edib.