ABŞ-nin tam bərpası üçün “Üçüncü Dünya ölkələrindən” miqrasiya dayandırılacaq-Tramp

ABŞ Prezidenti Donald Tramp Amerikanın sistemini tam bərpa etmək məqsədilə miqrasiya siyasətinə ciddi dəyişikliklər gətirməyi planlaşdırdığını açıqlayıb. O bildirib ki, administrasiyası bütün “Üçüncü Dünya ölkələri”ndən gələn miqrasiyanı daimi olaraq dayandırmaq üzərində işləyir. Prezident bu barədə məlumatı özünün sosial media platforması olan "Truth Social" vasitəsilə ictimaiyyətə çatdırıb.

Bu plan çərçivəsində, vətəndaşlığı olmayan şəxslərə verilən bütün federal yardımlar və subsidiyalar ləğv ediləcək. Tramp qeyd edib ki, ölkə daxilində asayişi pozan miqrantlar vətəndaşlıq hüquqlarından məhrum ediləcəklər. Bundan əlavə, ictimaiyyət üçün yük sayılan, təhlükə yaradan və ya “Qərb sivilizasiyası ilə uyğunlaşmayan” bütün xarici vətəndaşlar ölkədən deportasiya olunacaqlar. Bu tədbirlər ABŞ sisteminin tam şəkildə öz qaydasına qayıtması üçün atılacaq addımlar kimi təqdim edilir.

Prezidentin bu sərt miqrasiya bəyanatları Ağ Ev yaxınlığında baş vermiş silahlı hadisədən dərhal sonra səsləndirilib. Həmin insident nəticəsində bir Milli Qvardiya üzvü güllələnərək öldürülmüşdü. Hadisəni törədən şəxsin Əfqanıstan vətəndaşı olduğu deyilirdi. Bu hadisə miqrant siyasətinə dair daha sərt mövqe səsləndirməyə zəmin yaratdı.