ABŞ ordusu yaxın illərdə bir milyon PUA almağı planlaşdırır

ABŞ yaxın iki-üç il ərzində hərbi gücünü əhəmiyyətli dərəcədə artırmağı planlaşdırır. Ölkənin niyyəti ən azı bir milyon pilotsuz uçuş aparatı (PUA) almaq və gələcəkdə daha çox istehsal üçün öz təchizat şəbəkəsini yaratmaqdır. Bu barədə ABŞ-nin ordu naziri Daniel Driskoll məlumat verib. Hazırda ABŞ hər il təqribən 50 min PUA alır. Yeni plan mövcud alış tempinin kəskin artırılmasını nəzərdə tutur.

ABŞ ordusu üçün əsas prioritet genişmiqyaslı yerli dron istehsalı üçün şərait yaratmaqdır. Bu böyük plan hazırda xaricdən, əsasən də Çindən idxal edilən mühüm komponentlərin ölkə daxilində hazırlanmasını stimullaşdırmağı əhatə edir. Söhbət mühərriklər, sensorlar, batareyalar və dövrə lövhələri kimi vacib hissələrdən gedir. Yerli istehsalı artırmaq xarici təchizatçılardan, xüsusilə Çindən asılılığı azaltmağa kömək edəcək və hərbi təchizat şəbəkəsini daha etibarlı edəcək.

Ordu naziri Driskoll həmçinin bildirib ki, ABŞ Müharibə Nazirliyi (Pentaqon) dronların istifadəsinə yanaşmasını dəyişməyi düşünür. Pentaqon artıq pilotsuz sistemlərə bahalı və unikal qurğular kimi baxmır. Əksinə, onlara döyüş meydanında istehlak materialları kimi baxılır. Bu strateji dəyişiklik dronların kütləvi şəkildə və daha fərqli məqsədlər üçün istifadə ediləcəyini göstərir.