ABŞ qanunsuz miqrantların saxlanması üçün anbarlardan istifadə edə bilər

ABŞ Prezidenti Donald Trampın administrasiyası qanunsuz miqrantları deportasiyadan əvvəl saxlamaq üçün böyük anbarlardan istifadə etmək imkanını araşdırır. Ağ Ev və Daxili Təhlükəsizlik Nazirliyindəki mənbələrə əsasən yayılan məlumata görə, administrasiya bu böyük obyektləri əldə etmək niyyətindədir. Bu cür binalar adətən “Amazon” kimi onlayn pərakəndə satış şirkətləri üçün nəzərdə tutulur.

Mənbələr bildirir ki, araşdırılan bu anbarların orta sahəsi mövcud miqrant saxlama mərkəzlərinin sahəsindən təxminən iki dəfə böyükdür. Bu genişlik daha çox qanunsuz miqrantın saxlanmasına şərait yaradacaq. ABŞ-ın İmmiqrasiya və Gömrük Xidməti (ICE) xüsusilə ölkənin cənub hissəsindəki hava limanlarının yaxınlığında yerləşən anbarlarla maraqlanır. Bu yerlər miqrantların ən çox deportasiya edildiyi ərazilər hesab edilir.

Hazırda ICE müəssisələrində rekord sayda miqrant saxlanılır. Noyabrın 6-da yayılan məlumatlara görə, təxminən 66 000 miqrant bu mərkəzlərdə saxlanılır. ICE-in anonim nümayəndəsi agentliyin müəssisələrinin ümumi tutumunun hazırda 70 000 nəfər üçün nəzərdə tutulduğunu bildirib. Mövcud saxlama yerləri dolmaq üzrə olduğu üçün, administrasiya yeni saxlama şəraiti yaratmaq məqsədilə böyük anbarlardan istifadə planını nəzərdən keçirir.