ABŞ səfirliyi: Ölkəmiz tərəfindən verilən texnika Azərbaycana 90 milyon dollarlıq heroin aşkarlamağa kömək edib

ABŞ-nin Azərbaycandakı səfirliyi ölkə gömrük işçilərinə narkotik vasitələri tapmağa imkan verən texnikanın təqdim edildiyini bildirib. Səfirliyin sosial şəbəkə hesabında yayılan məlumata görə, Astara gömrükçüləri bu ayın əvvəlində böyük bir uğur qazanıblar. Onlar İrandan Estoniyaya gedən tranzit yükündə 90 milyon ABŞ dolları dəyərində olan külli miqdarda herioni müsadirə ediblər.

Bu həcmdə təhlükəli narkotikin ələ keçirilməsi Azərbaycan Dövlət Gömrük Komitəsinə ABŞ tərəfindən verilmiş xüsusi sistem sayəsində mümkün oldu. Diplomatik nümayəndəlik bu nailiyyətin əsas səbəbini açıqladı. Narkotiklərin aşkarlanması 2021-ci ildə ABŞ səfirliyi nəzdində fəaliyyət göstərən Hərbi Qrup tərəfindən təqdim edilmiş texniki avadanlıqla bağlıdır. Söhbət dəmir yolu vaqonlarının stasionar tipli yoxlama baxış sistemindən gedir. Gömrük postlarında müasir yoxlama texnikasının istifadəsi böyük miqyaslı qaçaqmalçılığın qarşısını almaq üçün çox vacibdir.

Səfirlik vurğulayıb ki, bu əməliyyat, xüsusilə ABŞ-Azərbaycan tərəfdaşlığı çərçivəsində, narkotik qaçaqmalçılığına qarşı mübarizədə beynəlxalq əməkdaşlığın vacib olduğunu təsdiqləyir. Ay ərzində həyata keçirilən bu müvəffəqiyyətli müsadirə, iki ölkə arasındakı əməkdaşlığın hər iki tərəfə faydalı olduğunu göstərir. Bu tərəfdaşlıq Amerika, Azərbaycan və bütün region üçün təhlükəsizliyin güclənməsinə xidmət edir. 90 milyon dollarlıq heroinin müsadirəsi həm regional, həm də qlobal miqyasda narkotik marşrutlarına ciddi zərbə vurur.