ABŞ Senatı şatdaunun ləğvini nəzərdə tutan qanun layihəsini qəbul edib

ABŞ Senatında hökumətin fəaliyyətini dayandıran şatdauna son qoymaq məqsədi daşıyan güzəştli maliyyələşdirmə layihəsi qəbul edilib. Bu qanun layihəsi Amerika hökumətinin ilin sonuna qədər fəaliyyətini davam etdirməsi üçün zəruri maliyyənin təmin edilməsini nəzərdə tutur. Səsvermə nəticələrinə əsasən, layihə 60 lehinə və 40 əleyhinə səs toplayaraq 60 səsli baryeri keçə bilib. ABŞ Senatının bu təşəbbüsü ölkədəki büdcə böhranının həlli yolunda ilk ciddi irəliləyiş kimi qiymətləndirilir.

Səsvermə yerli vaxtla bazar günü axşam saat 20:00 radələrində başlayıb və təxminən üç saat davam edib. Layihənin qəbulu üçün lazım olan 60 səsin toplanması həftəsonu olduğundan bəzi senatorların iclasa qatılması zaman alıb. Əvvəlcədən elan olunduğu kimi, səsvermə zamanı Demokratlar Partiyasından olan səkkiz senator layihəni dəstəkləyərək nəticənin müsbət olmasına kömək edib. Təklifin məqsədi hökumətin ilin sonuna kimi maliyyələşməsini təmin etməkdir.

Senatda bu layihənin qəbulu hökumətin dərhal açılması demək olmasa da, şatdaunun ləğvi istiqamətində həlledici addımdır. Layihənin tam şəkildə qüvvəyə minməsi üçün növbəti mərhələdə o, Nümayəndələr Palatasında səsverməyə çıxarılmalıdır. Nümayəndələr Palatasında təsdiqləndikdən sonra qanun layihəsi son təsdiq üçün Prezidentə göndərilməlidir. Yalnız bu prosedurlar tamamlandıqdan sonra şatdaun rəsmən ləğv ediləcək.