AÇG-də quyular kiçilir, geologiya mürəkkəbləşir, texnologiya həyati zərurətə çevrilib - bp

Azəri–Çıraq–Günəşli (AÇG) yataqlarında texnoloji həllərin tətbiqi həyati bir zərurətə çevrilib. Bu sahədə quyuların istehsal gücü azalır, eyni zamanda geologiya mürəkkəbləşir. bp-nin Azərbaycan, Gürcüstan və Türkiyə (AGT) üzrə regional prezidenti Ciovanni Kristofoli Bakıda keçirilən SPE 2025 Xəzər Texniki Konfransında bu barədə danışıb.

Kristofoli qeyd edib ki, AÇG dünya səviyyəli nəhəng yataqlardan biridir və 8-9 milyard barel neft ehtiyatına malikdir. O, bu ehtiyatların böyüklüyünü vurğulayaraq, iqtisadi və strateji baxımdan qiymətləndirmə aparıb. "Təsəvvür edin ki, Aya çıxıb Yer kürəsinə baxırsınız və özünüzə sual verirsiniz: dünyanın ən iri karbohidrogen ehtiyatları haradadır? Xəzər və AÇG həmin mərkəzlərdən biridir," Kristofoli bildirib. Belə böyük ehtiyatın 60-80 faizini yerin altında qoymaq həm iqtisadi, həm də strateji cəhətdən qəbuledilməzdir.

Regional prezident ACG-dəki hasilat fərqlərinə diqqət çəkdi. Əgər 5-10 il əvvəl qazılan quyular 20-30 min barel hasil edirdisə, bu gün yeni quyular cəmi 2-3 min barel verir. O dedi ki, quyular kiçilir, onların strukturu inanılmaz dərəcədə mürəkkəbləşir. Geologiya da getdikcə çətinləşir. Bu mürəkkəb vəziyyət isə yeni texnologiya ehtiyacını artırır.

Kristofoli əlavə edib ki, texnologiya və innovasiya yataqlardan resursları çıxarmaq və Avropa, eləcə də digər bazarlara çatdırmaq üçün həyati əhəmiyyət daşıyır. Texnologiya bir zərurətə çevriləndə coğrafi məhdudiyyətlər aradan qalxır. Onun sözlərinə görə, bu tələbat sənayeni irəli aparır. Qapalı quru coğrafiyasının heç bir maneə yaratmadığını deyən Kristofoli, texnoloji tərəqqinin enerji hasilatı üçün imkanları genişləndirdiyini söylədi.