Ağdərədə minaya düşən şəxsin ayağı amputasiya olub, vəziyyəti ağırdır - YENİLƏNİB-2

2025-ci il noyabrın 16-da Ağdərə rayonunun Sırxavənd kəndi ərazisində ağır mina hadisəsi qeydə alınıb. Həmin gün saat 13:20 radələrində 1990-cı il təvəllüdlü bir kişi piyada əleyhinə minanın partlaması nəticəsində ciddi xəsarət alıb.

Yaralı, Bərdə kənd sakini Əliyev Natiq Namiq oğlu dərhal Bərdə Rayon Mərkəzi Xəstəxanasına təxliyə edilib. Xəstəxana həkimləri pasiyentin sol aşağı ətrafı üzərində əməliyyat aparmaq məcburiyyətində qalıblar. Məlumata görə, sol aşağı ətrafın baldırın yuxarı hissəsindən amputasiyası icra olunub. Hadisə zamanı aldığı xəsarətlərlə əlaqədar Natiq Əliyev hazırda Reanimasiya şöbəsindədir. Onun vəziyyəti ağırdır, müalicəsi davam etdirilir.

Azərbaycan Respublikası Daxili İşlər Nazirliyi, Baş Prokurorluq və Minatəmizləmə Agentliyinin (ANAMA) Mətbuat Xidmətləri bu faktla bağlı birgə məlumat yayıb. Partlayış işğaldan azad edilmiş ərazilərdə, minalardan hələ tam təmizlənməmiş ərazidə baş verib. Bu hadisə həmin ərazilərdə təhlükəsizlik qaydalarına riayət etməyin nə qədər vacib olduğunu bir daha göstərir. Faktla bağlı Ağdərə Rayon Prokurorluğunda lazımi araşdırma işləri aparılır.

ANAMA, DİN və Baş Prokurorluq vətəndaşları bir daha xəbərdar edir. Rəsmi qurumlar insanları təhlükəsizlik qaydalarına ciddi riayət etməyə, mina təhlükəsi işarələrinin göstəricilərinə diqqətlə yanaşmağa çağırır. Vətəndaşlar bələd olmadıqları və hələ təmizlənməmiş ərazilərə daxil olmaqdan qəti şəkildə çəkinməlidirlər.