Almaniya miqrasiya siyasətini sərtləşdirən qanun dəyişikliklərini qəbul edib

Bundestaqın bugünkü iclasında Almaniyanın miqrasiya siyasəti ilə bağlı qanuna bir sıra mühüm dəyişikliklər təsdiqləndi. Qəbul edilmiş düzəlişlər hökumətin miqrasiya siyasətini daha da sərtləşdirir. Yeni qaydalara əsasən, hökumət bundan sonra Bundesratın təsdiqinə ehtiyac olmadan ölkələri istədiyi zaman "təhlükəsiz mənşə ölkələri" kimi təsnif edə biləcək.

Bu addım həmin ölkələrdən gələn şəxslərin deportasiyasını xeyli asanlaşdıracaq. Hökumətin məqsədi əsassız sığınacaq müraciətlərinin qarşısını almaq və Miqrasiya və Qaçqınlar İdarəsində (BAMF) mövcud prosedurları sürətləndirməkdir. Dəyişikliyə uyğun olaraq, təhlükəsiz mənşə ölkələrindən gələnlərin sığınacaq ərizələri daha çox hallarda "açıq-aşkar əsassız" kimi qiymətləndiriləcək.

Bu qanun paketi çərçivəsində bəzi hüquqi prosedurlarda da dəyişikliklər nəzərdə tutulur. Deportasiya edilə biləcək şəxslərə dövlət hesabına vəkil təyin edilməsi hüququ ləğv edilir. Qanun layihəsinə hökumət koalisiyasındakı partiyalarla yanaşı, Almaniya üçün Alternativ Partiyası (AfD) də dəstək verdi. Yaşıllar və Sol partiya isə bu dəyişikliklərə qarşı çıxdı. Bundan başqa, vətəndaşlığa qəbul zamanı qəsdən yanlış məlumat verən şəxslər üçün on illik qadağa tətbiq olunacaq ki, bu da saxtakarlığın qarşısını almağa yönəlib.