Almaniyada quş qripi sürətlə yayılır

Almaniyada quş qripinin (H5N1) sürətli yayılması ölkə daxilində ciddi narahatlıq yaradıb. Vəziyyət havaların soyuması ilə daha da gərginləşir, çünki bu, yoluxma hallarının artacağı deməkdir. “Spiegel” nəşrinin məlumatına görə, virusla mübarizə çərçivəsində hazırda ölkə üzrə təxminən 400 min quş məhv edilib.

Epidemiyanın miqyasını göstərən əsas hadisə Brandenburq əyalətində yaşanıb. Oradakı iki böyük təsərrüfatda 130 min qaz, ördək, toyuq və hind toyuğunun məhv edilməsi qərara alınıb. Bu, quşçuluq sektoruna böyük iqtisadi zərbə vurur. Mütəxəssislər virusun nəzarət altına alınmasının çətin olduğunu bildirir. Onlar ilk dəfə virusun vəhşi quşlarda da aşkarlanmasına xüsusi diqqət çəkirlər. Əsas daşıyıcının isə durnalar olduğu qeyd olunur.

Rəsmilər epidemiya nəzarət altına alınana qədər sərt baytarlıq və biotəhlükəsizlik tədbirlərinin davam edəcəyini açıqlayıblar. Hökumət quş qripinin qarşısını almaq üçün səylərini birləşdirir. Mövcud qaydalara əsasən, xəstəlik səbəbindən məhv edilən heyvanların sahiblərinə Heyvan Xəstəlikləri Fondu tərəfindən kompensasiya ödənilir. Hazırda bir heyvana görə 50 avro müəyyən edilib. Lakin Kənd Təsərrüfatı Nazirliyi bu məbləği 110 avroya qədər artırmağı təklif edib. “Bild” qəzetinin məlumatına görə, Avropa İttifaqı bu təşəbbüsü ilkin olaraq təsdiqləyib. Bu addım fermerlərə dəyən zərərin aradan qaldırılmasına kömək etməyi hədəfləyir. Nazirlik ehtiyac yaranarsa, Texniki Yardım Xidmətinin (THW) də mübarizə tədbirlərinə cəlb edilə biləcəyini qeyd edib.