Alptekin Cihangir İşbilir: Türk dövlətlərinin vahid məlumat bazasının olmaması təəssüf doğurur

Türkiyənin Azərbaycandakı Səfirliyinin mətbuat müşaviri Alptekin Cihangir İşbilir Türk dövlətləri arasında vahid məlumat bazasının olmamasını ciddi çatışmazlıq sayır. O, bu fikri noyabrın 27-də Bakıda keçirilən Türk Dövlətləri Təşkilatının (TDT) Media Forumu çərçivəsində səsləndirib. Müşavir “TDT Ölkələri arasında Rəqəmsal Media Mühitində Qarşılıqlı Əməkdaşlıq İmkanları” adlı paneldəki çıxışı zamanı belə bir bazanın yoxluğunun təəssüf doğurduğunu bildirib. İşbilirin sözlərinə görə, texniki imkanlar artsa da, türk dövlətləri media sahəsində birgə fəaliyyət üçün mövcud olan geniş bazanı tam istifadə edə bilmirlər.

Alptekin Cihangir İşbilir bu kontekstdə Türkiyənin TRT kanalı ilə Azərbaycan Dövlət Televiziyası arasındakı mübadilə proqramlarını müsbət nümunə kimi göstərib. O, xüsusilə vurğulayıb ki, bu cür əməkdaşlıq istiqamətində davamlılıq əsas şərtdir. Müşavir bildirir ki, davamlı yanaşma öz-özlüyündə yeni imkanlar yaradır. Türkdilli dövlətlər arasında media mübadiləsi proqramlarının müntəzəm şəkildə həyata keçirilməsi informasiya boşluğunun aradan qaldırılmasına kömək edə bilər.

C. İşbilir türk dövlətlərinin vahid informasiya bazasına malik olmamasını texniki tərəqqi şəraitində böyük bir əskiklik kimi qeyd edib. Türk dövlətləri üçün media sahəsində birgə fəaliyyət baxımından geniş baza mövcuddur. Həmin potensialdan səmərəli istifadə etmək üçün ilk növbədə vahid məlumat bazası sisteminin qurulması zəruridir. Belə bir sistem birgə fəaliyyət üçün möhkəm zəmin yaradar.