Antalya Kitabxanasında Azərbaycan bölməsinin açılışı olub

Azərbaycan Mədəniyyət Elçilərinin I Forumu çərçivəsində, noyabrın 3-də, Antalya Kitabxanasında Azərbaycan bölməsinin açılışı mərasimi keçirilib.

Mədəniyyət Nazirliyindən verilən məlumata görə, bölmənin yaradılması bir sıra dövlət və bələdiyyə qurumlarının birgə əməkdaşlığı sayəsində mümkün olub. Bu təşəbbüsə Azərbaycan Mədəniyyət Nazirliyi, Azərbaycanın Türkiyədəki Səfirliyi, Ankaradakı Azərbaycan Mədəniyyət Mərkəzi və Antalya Böyükşəhər Bələdiyyəsi dəstək verib. Bu hadisə iki ölkə arasındakı mədəni əlaqələrin inkişafında atılan mühüm addımdır.

Mərasimdə yüksək səviyyəli qonaqlar iştirak ediblər. Mədəniyyət naziri Adil Kərimli, səfir Rəşad Məmmədov açılışda hazır idilər. Türkiyə tərəfindən isə Antalya valisinin müavini Ayhan Yazqan və Antalyanın Kepez rayonunun bələdiyyə sədri Mesut Kocagöz qatılıblar.

Kitabxananın direktoru Oğuzhan Ceylan yeni yaradılan Azərbaycan bölməsi haqqında ətraflı məlumat verib. O bildirib ki, bölmədə ölkəmizlə bağlı 700 nüsxə fərqli nəşr nümunəsi mövcuddur. Çıxış edən digər şəxslər bu bölmənin açılmasını yüksək qiymətləndirərək, onun iki qardaş ölkənin mədəni əlaqələrinə böyük töhfə olduğunu vurğulayıblar. Daha sonra simvolik açılışı bildirən lent kəsilib.

Açılışdan sonra qonaqlar kitabxana ilə ümumi tanışlıq ediblər. Kitabxana 24 saat fasiləsiz fəaliyyət göstərir və 100 min qeydiyyatlı oxucusu var. Diqqət çəkən odur ki, bu oxucuların min nəfəri Azərbaycan vətəndaşlarıdır. Kitabxananın Azərbaycan bölməsinin kolleksiyası çox zəngindir. Buraya klassik və müasir ədəbiyyat, ölkəmizin tarixi, incəsənəti, folkloru daxildir. Həmçinin, şanlı Zəfərimizlə bağlı nəşrlər də oxucuların istifadəsinə verilib.