"Araz-Naxçıvan"ın futbolçusu əməliyyat olunub

“Araz-Naxçıvan” klubunun üzvü və Azərbaycan millisinin müdafiəçisi Rahil Məmmədov zədə səbəbindən cərrahi əməliyyat olunub. Zədələnmə Rahil Məmmədov ölkə millisinin Ukrayna ilə keçiriləcək matça hazırlığı dövründə baş vermişdi. Naxçıvan təmsilçisinin mətbuat xidmətinə istinadən verilən məlumata görə, müdafiəçiyə budun gətirici əzələlərindən birinin tam qopması kimi ağır diaqnoz qoyulmuşdu.

Bu ciddi zədənin müalicəsi üçün Finlandiyada cərrahi müdaxilə tələb olunub. Əməliyyat Finlandiyanın tanınmış Pihlajalinna klinikasında həyata keçirilib. Qeyd olunur ki, cərrahiyyə uğurla başa çatıb.

Uğurlu əməliyyatdan sonra futbolçunun vəziyyəti hazırda yaxşıdır. Araz-Naxçıvan klubundan bildirilib ki, müdafiəçi özünü yaxşı hiss edir və bərpa prosesinə başlayacaq. Klub məşqlərə başlayacağı tarix haqqında əlavə məlumat veriləcəyini bildirib.