ARDNF Çin şirkəti ilə bərpa olunan enerji məlumatlarını mübadilə edəcək

Azərbaycan Dövlət Neft Fondu (ARDNF) Çinin "China Energy International Group Co., Ltd." ("CEEC International") şirkəti ilə mühüm razılığa gəlib. Bu razılıq bərpa olunan enerji sahəsində məlumat mübadiləsinin aparılmasına dairdir.

Bu razılıq Fondun İcraçı direktorunun müavini Rövşən Cavadov və aidiyyəti struktur bölmələrinin əməkdaşları ilə "CEEC International" şirkətinin sədri Syaodan Linin başçılıq etdiyi nümayəndə heyətinin görüşündə əldə edilib. ARDNF və "CEEC International" Körfəz ölkələri, Çin və Cənub-Şərqi Asiya regionlarında həyata keçirilə biləcək layihələri müntəzəm nəzərdən keçirməyi qətiləşdiriblər.

Bu layihələrə bərpa olunan enerji, enerji saxlama və tullantıların idarəedilməsi sahələri daxildir. Tərəflər müzakirə olunan təşəbbüslərə və digər investisiya imkanlarına dair məlumat mübadiləsi aparılması barədə razılıq əldə ediblər. Həmçinin, tərəflər 2025-ci il sentyabrın 8-də imzalanmış Anlaşma Memorandumu çərçivəsində mövcud əməkdaşlığın daha da dərinləşdirməsini müzakirə ediblər. Onlar qarşılıqlı maraq doğuran yeni birgə investisiya imkanlarının müəyyənləşdirilməsi və əməkdaşlıq mexanizmləri barədə fikir mübadiləsi ediblər.

"CEEC International" enerji, su təsərrüfatı, sement sənayesi və digər irihəcmli infrastruktur sahələri üzrə Çində və beynəlxalq miqyasda investisiya və xidmətlər təqdim edən böyük sənaye konqlomeratıdır. Şirkət Çindən kənar beynəlxalq biznes fəaliyyətlərini idarə edən qrupun struktur vahididir.