Art Weekend zamanı “Suyun sirri” pantomim tamaşanın premyerası olacaq (VİDEO)

Heydər Əliyev Fondunun və İDEA İctimai Birliyinin təşkilatçılığı, həmçinin Mədəniyyət Nazirliyinin tərəfdaşlığı ilə keçirilən Art Weekend layihəsinin əsas elementi sudur. Paytaxtda 31 oktyabr - 2 noyabr tarixlərində baş tutacaq bu tədbirlər zamanı su müxtəlif təqdimatların mərkəzi mövzusu olacaq. Bu təqdimatlardan biri, **“Suyun sirri” pantomim tamaşasının premyerası** isə Daş Salnamə Muzeyində təşkil ediləcək.

Bu tamaşa xüsusi olaraq “Bakıya Uçuş. İncəsənət Həftəsonu: Gələcəyi İNDİ Duy” incəsənət festivalı üçün hazırlanıb. Art Weekend beynəlxalq incəsənət dünyası ilə mənalı dialoq yaratmağı təşviq edir. “Suyun sirri” tamaşasının müəllifi Azərbaycanın Xalq artisti, pantomim aktyoru Pərviz Məmmədrzayevdir. Layihə insan və su arasındakı əbədi bağlılığı təsvir edir.

Pərviz Məmmədrzayevlə bərabər, layihəyə yeddi aktyor cəlb edilib. Tamaşada insanların həyatın mənbəyi sayılan su axtarışları səhnələşdirilir. **Tamaşanın premyerası** noyabrın 1-də keçiriləcək. Layihənin müəllifi və təşəbbüskarı Heydər Əliyev Fondunun vitse-prezidenti, IDEA İctimai Birliyinin təsisçisi Leyla Əliyevadır. Bu layihə Bakını qlobal səviyyədə əks-səda yaradan, ənənə və müasirliyi birləşdirən, fərqli fikirləri bir araya gətirən mədəniyyət paytaxtı kimi təqdim etməyi hədəfləyir.