Arvadına zor tətbiq edilməsi ilə bağlı saxlanılan şəxs barəsində qərar verilib

Bakıda həyat yoldaşına fiziki zor tətbiq etməkdə ittiham olunan şəxs barəsində məhkəmə qərarı verilib. Polis tərəfindən saxlanılan Tamerlan Məmmədov barəsində 3 aylıq həbs qətimkan tədbiri seçilib. Nərimanov rayon Məhkəməsi bu qərarı ailə zorakılığı faktı ilə bağlı aparılan araşdırma çərçivəsində çıxarıb. Bu hadisə ictimaiyyət arasında böyük rezonans doğurmuşdu.

Hadisə oktyabrın 28-i gecə saatlarında qeydə alınıb. Həmin vaxt bir qadına yaşadığı ünvanda əri tərəfindən fiziki zor tətbiq edilməsi barədə polisə məlumat daxil olmuşdu. Əməli törətməkdə şübhəli bilinən T. Məmmədov qısa müddətdə polis əməkdaşları tərəfindən saxlanıldı. Polis zərərçəkənin xəsarətlərinin dərəcəsini dəqiq müəyyən etmək məqsədilə müvafiq ekspertiza təyin edib, araşdırma aparıb.

Qeyd edək ki, bu zorakılıq faktı ilə bağlı sosial şəbəkələrdə görüntülər yayılmışdı. Bu görüntülər kişini qadına qarşı şiddət göstərərkən əks etdirirdi. Yayılan kadrlarda qadının saçlarının qırxıldığı və onun təhqir edildiyi əks olunur. T. Məmmədov barəsində 3 aylıq həbs qətimkan tədbirinin seçilməsi ilə cinayət işinin istintaqı davam etdirilir.