Asiya İnkişaf Bankı Türkiyə üçün ilk maliyyə paketini təsdiqləyib

Asiya İnkişaf Bankı (AİB) Türkiyə ilə əməkdaşlığın yeni mərhələsi çərçivəsində ölkəyə dəstək üçün ilk maliyyə paketini təsdiqləyib. Bu maliyyə paketi 350 milyon avro/ABŞ dolları məbləğindədir. Paketin tərkibinə ölkənin 2023-cü ildə baş vermiş dağıdıcı zəlzələdən sonra zəlzələdən sonra bərpa səylərini dəstəkləmək üçün 150 milyon avro məbləğində suveren kredit daxildir. Həmçinin, "Akbank" və "Denizbank" üçün nəzərdə tutulmuş, hər biri 100 milyon ABŞ dolları dəyərində iki qeyri-suveren maliyyə aləti bu paketin bir hissəsidir. Bu çərçivədə Asiya İnkişaf Bankı (AİB) və Türkiyənin Xəzinə və Maliyyə Nazirliyi suveren kreditin verilməsi ilə bağlı ilk sazişi imzalayıblar.

Bu gün AİB prezidenti Masato Kanda Ankarada Türkiyə Prezidenti Rəcəb Tayyib Ərdoğanla görüş keçirdi. Görüş zamanı tərəflər gələcək əməkdaşlıq istiqamətlərini müzakirə etdilər. Onlar milli inkişaf gündəliyinin birgə həyata keçirilməsinə sadiq qaldıqlarını təsdiqlədilər. Razılaşmaya əsasən, bank 2026 və 2027-ci illərdə layihə maliyyələşdirilməsi üçün hər il 3 milyard ABŞ dolları ayırmağı planlaşdırır. Masato Kanda görüşdə vurğuladı ki, AİB Türkiyənin uzunmüddətli inkişafını və dayanıqlılığını dəstəkləməkdən məmnundur. Şərq və Qərbi birləşdirən strateji mövqeyi, bilik və təcrübə zənginliyi sayəsində Türkiyə regionun inkişafında mühüm iştirak edə bilər.

Bank Türkiyədə rəsmi fəaliyyətə başlayaraq 2025–2027-ci illəri əhatə edən Müvəqqəti Ölkə Tərəfdaşlığı Strategiyasını (ICPS) işə salıb. AİB hökumətlə sıx əməkdaşlıq edir və iqtisadi dayanıqlığı gücləndirməyə, regional əlaqəliliyi artırmağa, eləcə də özəl investisiyaları səfərbər etməyə yönəlmiş etibarlı layihə portfeli yaratmağa çalışır. M.Kanda 2023-cü ildə baş vermiş dağıdıcı zəlzələdən sonra hökumətin iqtisadiyyatı sabitləşdirmə səylərini xüsusi qeyd etdi. O bildirdi ki, bu tədbirləri dəstəkləmək üçün AİB 2026-cı ildən başlayaraq maliyyələşmə həcmini artıracaq. Bank ölkənin inkişafına töhfə verən mühüm həllər təqdim edəcək. AİB Türkiyədə sahibkarlığı dəstəkləməyə, kapitalı cəlb etməyə, qlobal təcrübəni yaymağa və "yaşıl" inkişafı sürətləndirmək, maliyyə inklüzivliyini artırmaq, əlaqəliliyi gücləndirmək üçün tərəfdaşlıqlar qurmağa hazırdır. Bundan əlavə, AİB Türkiyədə təkcə dövlət sektoru ilə deyil, həm də özəl sektorla əməkdaşlığı genişləndirməyi planlaşdırır.

Xatırladaq ki, Asiya İnkişaf Bankı 1966-cı ildə yaradılıb. Onun baş ofisi Filippinin Manila şəhərində yerləşir. Bankın səhmdarları arasında 69 ölkə var, bu ölkələrdən 50-si Asiya-Sakit okean regionuna aiddir.