Avropa İttifaqı Orta Dəhliz çərçivəsində nəqliyyat əlaqəliliyi sahəsində Azərbaycanı strateji tərəfdaş olaraq tanıyır - Avronest

Avropa İttifaqı (Aİ) Orta Dəhliz və "Global Gateway" təşəbbüsü altında nəqliyyat əlaqəliliyi sahəsində Azərbaycanı əsas tərəfdaş olaraq qəbul edir.

Bu mühüm məlumat Aİ ilə “Şərq Tərəfdaşlığı” ölkələri arasında ticarətin, əməkdaşlığın və investisiyaların təşviqinə dair Avronest Parlament Assambleyasının qətnaməsində əksini tapıb. Sənəd Azərbaycanın Xəzər və Qara dəniz regionları arasındakı vacib rolunu təsdiqləyir. Qətnamədə qeyd edilir ki, bu tərəfdaşlıq xüsusilə nəqliyyat və enerji sahəsində regional inteqrasiyanı dərinləşdirir.

Assambleya sənədində bir sıra layihələr vurğulanır. Qara dənizin dibi ilə çəkiləcək sualtı elektrik kabeli və Transxəzər rəqəmsal dəhlizi kimi təşəbbüslər bu əməkdaşlığın əsas göstəriciləridir. Bu layihələr Xəzər regionu, Cənubi Qafqaz və Aİ arasında bərpa olunan enerjinin və yüksək sürətli rəqəmsal trafikin ötürülməsinə xidmət edir, eyni zamanda “Global Gateway” təşəbbüsünün məqsədlərinə tam uyğun gəlir. Enerji təhlükəsizliyi baxımından isə Cənub Qaz Dəhlizi Aİ bazarlarına təbii qaz tədarükü üçün etibarlı və əhəmiyyətli marşrutdur. Bu, enerji təchizatı mənbələrini şaxələndirməyə kömək edir, və Aİ ilə Azərbaycan “REPowerEU” kimi təşəbbüslər çərçivəsində əməkdaşlığı inkişaf etdirməyə hazır olduqlarını bildiriblər.

Orta Dəhliz Asiya ilə Avropanı birləşdirən mühüm nəqliyyat və ticarət marşrutudur. Bu marşrut regionun bir çox ölkəsindən keçir və ənənəvi Şimal və Cənub dəhlizlərinə alternativ təklif edir. Marşrut Çindən başlayır, Qazaxıstan, Özbəkistan və Türkmənistan daxil olmaqla Mərkəzi Asiya ölkələrindən keçir. Daha sonra Xəzər dənizi ilə keçərək Azərbaycan, Gürcüstan və Türkiyə üzərindən Avropaya çatır. Orta Dəhliz Asiyanın şərq hissələrini, o cümlədən Çini Avropa ilə əlaqələndirən quru yoludur, beləliklə, daha uzun dəniz yollarından yan keçməyə imkan verir.