Azərbaycan Elektron İştirakçılıq İndeksində 10 pillə irəliləyib - Nazir müşaviri

Rəqəmsal inkişaf və nəqliyyat nazirinin müşaviri Rəşad Bayramov ölkənin elektron idarəetmə və rəqəmsal transformasiya sahəsində əldə etdiyi nailiyyətlər barədə məlumat verib. O, Beynəlxalq Telekommunikasiya İttifaqının Ümumdünya Telekommunikasiya İnkişafı Konfransı (WTDC-25) üzrə keçirilən media sessiyasında çıxış edib. Nazir müşavirinin sözlərinə görə, ötən illər ərzində Azərbaycan müəyyən irəliləyişlər göstərib. Məsələn, Elektron İştirakçılıq İndeksində ölkəmizin yeri 10 pillə irəli gedib və il ərzində 28% artım əldə olunub. Bu irəliləyişlər Azərbaycanın müvafiq reytinqlərdəki mövqeyinin güclənməsinə səbəb olub.

Ölkənin rəqəmsal reytinqlərdə yüksəlməsi bir neçə əsas amillə bağlıdır. Bu amillərə startap ekosisteminin böyüməsi, texnoparkların fəaliyyətindəki fərqlər, rəqəmsal hökumətə keçid, infrastrukturun gücləndirilməsi və dövlət xidmətlərinin rəqəmsallaşdırılması daxildir. Azərbaycan ilk dəfə olaraq BMT-nin Elektron Hökumətin İnkişafı indeksində də yüksək nəticələrə nail olub. Həm onlayn dövlət xidmətləri, həm də Telekommunikasiya infrastrukturu göstəricilərində 21% artım qeydə alınıb.

Rəşad Bayramov çıxışında qeyri-neft sektorunun inkişafının Azərbaycan üçün strateji əhəmiyyət daşıdığını bildirib. İnformasiya və rabitə texnologiyaları (İKT) bu sektorun inkişafında getdikcə daha böyük əhəmiyyət kəsb edir. Nazir müşaviri açıqlayıb ki, 2025-ci ilin yanvar-sentyabr ayları ərzində Azərbaycanın informasiya və rabitə sektoru üzrə gəlirləri əvvəlki ilin müvafiq dövrü ilə müqayisədə 6,9% artıb. Bu gəlirlər 2,7 milyard manat təşkil edib. İKT sektorunun gəlirlərindəki bu artım ölkənin rəqəmsal iqtisadiyyatının genişlənməsini göstərir.