Azərbaycan İdman Jurnalistləri Assosiasiyasının 30 illik yubileyi qeyd olunub

Beynəlxalq İdman Jurnalistləri Assosiasiyasının (AIPS) və Avropa İdman Jurnalistləri İttifaqının (AIPS Europe – UEPS) rəsmi təmsilçisi olan Azərbaycan İdman Jurnalistləri Assosiasiyası – AİJA 30 illik fəaliyyət yubileyini qeyd etdi. Tədbir Milli Olimpiya Komitəsində baş tutdu. Bu mərasimdə ölkənin tanınmış idman jurnalistləri, media rəhbərləri, idman ictimaiyyətinin nümayəndələri, həmçinin dövlət və müxtəlif idman qurumlarının təmsilçiləri iştirak ediblər.

AİJA prezidenti Eldar İsmayılov tədbir iştirakçılarını salamladı, Assosiasiyanın inkişaf yolu barədə danışdı. O qeyd etdi ki, təşkilat 1995-ci ilin 6 noyabr tarixindən etibarən fəaliyyət göstərir. İsmayılov AİJA-nın idman jurnalistikasının formalaşmasında böyük rolu olduğunu söylədi. Eyni zamanda, təşkilat Azərbaycan mediasının beynəlxalq aləmdə tanıdılması üçün çalışıb. Prezident bu illər ərzində AİJA-nın çoxsaylı layihələrə, beynəlxalq təlimlərə və idman tədbirlərinə imza atdığını bildirdi. Bütün bu işlərin əsas məqsədi peşəkar idman jurnalistikasının inkişafına töhfə vermək olub.

Mərasimdə bir sıra mühüm təşkilatların təbrik məktubları səsləndirildi. Milli Olimpiya Komitəsi, Gənclər və İdman Nazirliyi, Azərbaycan Mətbuat Şurası, eləcə də Beynəlxalq İdman Jurnalistləri Assosiasiyası (AIPS) Assosiasiyanı təbrik etdi. Daha sonra AİJA İdman Mükafatlarının qaliblərinə plaketlər təqdim edildi. Çıxış edən qonaqlar Assosiasiyanın ötən 30 illik səmərəli fəaliyyətini yüksək qiymətləndirdilər, gələcəkdə daha böyük uğurlara imza atacağına inandıqlarını bildirdilər. Tədbir çərçivəsində AİJA-nın 30 illik fəaliyyətini əks etdirən qısa video-çarx da nümayiş olundu. Sonda təşkilatın gələcək planları haqqında məlumat verildi. Bu planlara gənc jurnalistlərin peşəkar inkişafı üçün nəzərdə tutulan yeni layihələr və beynəlxalq əməkdaşlıq imkanları daxildir.