Azərbaycan Ordusunda Müstəqilliyin Bərpası Günü qeyd olunub

Azərbaycan Ordusunda 18 Oktyabr - Müstəqilliyin Bərpası Günü münasibətilə bir sıra tədbirlər həyata keçirilib.

Bu tədbirlərdə Azərbaycanın müstəqilliyi və suverenliyi uğrunda şəhid olan Vətən övladlarının, eləcə də Ümummilli Lider Heydər Əliyevin xatirəsi bir dəqiqəlik sükutla yad edilib. Ardınca Azərbaycan Respublikasının Dövlət Himni səsləndirilib.

Çıxış edənlər Ulu Öndər Heydər Əliyevin müasir Azərbaycan dövlətinin qurulması və inkişafındakı misilsiz xidmətlərindən danışıblar. Onlar müstəqilliyimizin qorunub saxlanılması istiqamətində atdığı qətiyyətli addımların tarixi əhəmiyyətini vurğulayıblar. Tədbirlərdə xüsusi qeyd edilib ki, Prezident İlham Əliyev tərəfindən Ümummilli Liderin strateji kursu müasir dövrün reallıqları nəzərə alınaraq uğurla davam etdirilir. Bu siyasət nəticəsində müstəqilliyimiz daha da möhkəmləndirilib, ölkənin ərazi bütövlüyü və suverenliyi tam bərpa olunub.

İştirakçılar Prezident İlham Əliyevin uzaqgörən və müdrik siyasəti sayəsində Azərbaycanda dayanıqlı inkişafın təmin olunduğunu diqqətə çatdırıblar. Bu siyasət dünyəvilik prinsiplərini qoruyur, ölkəmizin beynəlxalq aləmdə söz sahibi olmasına şərait yaradır. Tədbirlər çərçivəsində vətənpərvərlik mövzusunda sənədli filmlər, videoçarxlar və bədii kompozisiyalar təqdim edilib. Qeyd etmək lazımdır ki, bayram münasibətilə şəhidlərimizin məzarları və tarix muzeyləri ziyarət olunub.