Azərbaycan və Ermənistan arasında sülhün möhkəmləndirilməsi strateji nəqliyyat layihələri üçün şərait yaradacaq - Bokhari

“New Lines Institute”un Avrasiyada təhlükəsizlik və rifah məsələləri üzrə baş direktoru Kamran Bokhari Azərbaycan və Ermənistan arasında sülhün möhkəmlənməsinin regional nəqliyyat təşəbbüslərinin, o cümlədən TRIPP (The Trump Route for International Peace and Prosperity) layihəsinin həyata keçirilməsi üçün zəruri şərait yaradacağını bildirib. O, bu fikri Bakıda keçirilən Azərbaycan-ABŞ beyin mərkəzlərinin I forumunda səsləndirib. Bokhari qeyd edib ki, Cənubi Qafqazda qüvvələr balansı dəyişib. Bu gün regionun sabit və işlək tranzit marşrutuna çevrilməsi üçün əsas amil siyasi tənzimlənmədir. Ekspertin sözlərinə görə, Bakı və İrəvan arasında sülhün möhkəmləndirilməsi Cənubi Qafqazın tamhüquqlu şərq-qərb dəhlizinə çevrilməsi imkanlarını açır.

Mütəxəssis vurğulayıb ki, dayanıqlı sülh olmadan nə Transxəzər logistikasının, nə də bütün Orta Dəhliz infrastrukturunun normal fəaliyyətini təmin etmək mümkün deyil. Kamran Bokhari Vaşinqtonun bu layihələrə olan marağına da toxunub. O, ABŞ-ın avqustun 8-də keçirilən görüşdən sonra TRIPP-in inkişafına dəstək verməklə, regionun uzunmüddətli sabitliyi və əlaqəliliyi ilə bağlı marağını nümayiş etdirdiyini bildirib. O, həmçinin xatırladıb ki, bu layihə Birləşmiş Ştatların Avrasiya strategiyasının mühüm hissəsi ola bilər.

Lakin Bokhari bu layihənin reallaşması üçün əsas şərtin mövcudluğunu qeyd edir. O vurğulayıb ki, TRIPP-in gerçəkləşməsi yalnız möhkəm sülh şəraitində mümkündür. Eyni məhdudiyyətlər Orta Dəhliz üçün də keçərlidir. Ekspert əlavə edib ki, şərqi Ermənistan, Naxçıvan Muxtar Respublikası və Türkiyə arasındakı hissədə təhlükəsizlik təmin edilmədən, dəhlizin potensialı kifayət qədər məhdud qalacaq. Buna görə də, regionun iqtisadi gələcəyi beynəlxalq nəqliyyat layihələri vasitəsilə əlaqələrin bərpasına və sülhə sadiqliyə bağlıdır.