Azərbaycan və Kolumbiya parlamentləri arasında əməkdaşlıq genişlənir (FOTO)

Milli Məclisin Azərbaycan-Kolumbiya parlamentlərarası əlaqələr üzrə işçi qrupunun rəhbəri Müşfiq Cəfərov və qrupun üzvü Müşfiq Məmmədli Kolumbiyaya səfər ediblər. Bu səfər Kolumbiya Konqresinin Nümayəndələr Palatasının Kolumbiya-Azərbaycan dostluq qrupunun dəvəti əsasında baş tutub.

Səfər zamanı Milli Məclisin nümayəndə heyəti Kolumbiya Konqresinin tarixi binasını ziyarət etdi. Onlar həmçinin Nümayəndələr Palatası və Senatın plenar iclaslarında iştirak etdilər. Plenar iclaslar keçirilərkən hər iki Palatanın sədrləri Azərbaycan nümayəndə heyətini rəsmi şəkildə salamladılar. Onlar azərbaycanlı deputatları Kolumbiyada görməkdən məmnunluqlarını ifadə etdilər. Azərbaycanın Meksikadakı Səfirliyinin yaydığı məlumata görə, bu səfər iki ölkə arasında parlamentlərarası əməkdaşlığın inkişafı üçün atılan mühüm bir addımdır.

Səfər çərçivəsində bir çox ikitərəfli görüşlər baş tutdu. Nümayəndələr Palatasının Kolumbiya-Azərbaycan dostluq qrupunun rəhbəri Pedro Suares və qrupun üzvləri ilə danışıqlar aparıldı. Görüşlərdə Senatın baş katibi Dieqo Qonsales, Nümayəndələr Palatasının baş katibinin müavini Raul Avila, eləcə də “Colombia Humana” siyasi hərəkatının sədri Qloria Flores iştirak etdilər. Həmin görüşlərdə parlament diplomatiyasının və qarşılıqlı səfərlərin iki ölkə arasındakı münasibətlərin inkişafında böyük önəm daşıdığına diqqət çəkildi. Tərəflər ümumi çağırışlarla mübarizədə parlamentlərin iştirak səviyyəsinin artırılmasının vacibliyinə toxundular. Onlar dostluq və qarşılıqlı hörmətə əsaslanan əlaqələrin möhkəmləndirilməsi baxımından parlament əməkdaşlığını gücləndirmək və yeni birgə təşəbbüslər barədə fikir mübadiləsi apardılar. Görüşlər zamanı Azərbaycan tərəfi Kolumbiya Konqresinə ədalətli mövqeyinə görə minnətdarlıq etdi. Bu ədalətli mövqe Xocalı soyqırımı ilə bağlı qəbul edilmiş sənədlərdə də öz əksini tapıb.

Nümayəndə heyəti parlament görüşləri ilə yanaşı, Kolumbiyanın səhiyyə naziri Qiyermo Xaramiyo və Kolumbiya xarici işlər nazirinin Ofisinin rəisi Luis Dimate ilə nəzakət görüşləri keçirdi. Luis Dimate 2019-2022-ci illərdə ölkəmizdə səfir kimi çalışmışdı. Səfər çərçivəsində Azərbaycan nümayəndə heyətinin şərəfinə nahar da verildi. Naharda dostluq qrupunun üzvləri, iş adamları və media nümayəndələri iştirak etdilər. Azərbaycanlı deputatlar Kolumbiya Konqresinin rəsmi televiziyası “Canal Congreso”ya və “El Mismo” yerli televiziya kanallarına müsahibələr verərək səfərlə bağlı müsbət təəssüratlarını bölüşdülər. Heyət Pedro Suaresin dəvəti ilə Boyaka departamentinə də səfər etdi. Qonaqları müstəqillik mübarizəsinin rəmzi sayılan Boyoka körpüsündə fəxri qaravul və hərbi orkestr qarşıladı. Azərbaycanlı parlamentarilər P. Suareslə birlikdə “Müqəddəs Alov” abidəsinin önünə “Kolumbiya-Azərbaycan qardaşlığı” lentli əklil qoydular. Sonda nümayəndə heyəti departamentin paytaxtı Tunxa və Paipa şəhərlərini ziyarət etdi.