Azərbaycan və Mərkəzi Asiya ölkələri strateji əhəmiyyətə malik geosiyasi məkan formalaşdırır - Vüqar Rəhimzadə

Azərbaycan ilə Mərkəzi Asiya ölkələri arasında əlaqələr sürətlə inkişaf edir. Özbəkistanın paytaxtı Daşkənddə keçirilən Mərkəzi Asiya Dövlət Başçılarının 7-ci Məşvərət Görüşü tarixi hadisə kimi yadda qaldı. Dövlət başçısı İlham Əliyevin bu görüşdə iştirakı, çıxışı, qəbul edilən qərarlar və imzalanan sənədlər hazırda ölkə və dünya mətbuatında geniş müzakirə olunur. Ölkəmizin Mərkəzi Asiya platformasında tamhüquqlu iştirakçı statusu qazanması xarici siyasətimizin növbəti uğurudur. Bu qərarın perspektivləri Mərkəzi Asiya ölkələrinin dövlət başçılarının çıxışlarında da xüsusi qeyd edildi.

Özbəkistan Prezidenti Şavkat Mirziyoyev Azərbaycanın tamhüquqlu iştirakçı kimi bu formata qoşulması ilə bağlı qəbul edilən qərarı vurğulayıb. O, bu addımın Mərkəzi Asiya ilə Cənubi Qafqaz arasında güclü bir körpü quracağına və vahid əməkdaşlıq məkanının formalaşmasına yol açacağına əminliyini ifadə etdi. Bu birləşmə hər iki regionun strateji qarşılıqlı əlaqəsini və dayanıqlılığını gücləndirəcək. Qırğız Respublikasının Prezidenti Sadır Japarov da qardaş Azərbaycanın iştirakı ilə formatın genişləndirilməsinin Mərkəzi Asiyanın qarşısında beynəlxalq tranzit, logistika və energetika sahələrində yeni imkanlar açacağını bildirdi. Tacikistan Prezidenti Emoməli Rəhmon və Türkmənistan Prezidenti Sərdar Berdiməhəmmədov da Azərbaycanın formatda iştirakını təbrik etdilər. Milli Məclisin deputatı Vüqar Rəhimzadənin sözlərinə görə, bu qərar ölkəmizin artan beynəlxalq nüfuzunun, qlobal proseslərdə söz sahibliyinin göstəricisidir.

Vüqar Rəhimzadə qeyd edir ki, Azərbaycan və Mərkəzi Asiya artıq vahid geosiyasi və geoiqtisadi məkana çevrilir. Tarixi, mədəni, mənəvi əlaqələrimiz siyasi mərkəz halına gəlir. Azərbaycan Mərkəzi Asiyanın tərkib hissəsi, əməkdaşlıq və məşvərətçi formatın tamhüquqlu üzvüdür. Bu, ölkəmizin Cənubi Qafqazdakı fəaliyyətini inkar etmir; Azərbaycan həm Cənubi Qafqaz platformasında işini davam etdirir, həm də Mərkəzi Asiya istiqamətində fəaliyyətini genişləndirir. Prezident İlham Əliyev tədbirdə çıxış edərkən Azərbaycanla Mərkəzi Asiya dövlətləri arasında münasibətlərin xüsusi xarakter daşıdığını vurğuladı. "Bizi çoxəsrlik ortaq tarix, mənəvi və mədəni irs, qardaşlıq, dostluq, həmrəylik birləşdirir," deyən Prezident, bu əlaqələrə strateji tərəfdaşlıq xarakterinə malik yeni dinamika bəxş edildiyini qeyd etdi. Fəal qarşılıqlı fəaliyyət sayəsində Mərkəzi Asiya və Azərbaycan artıq qlobal miqyasda nüfuzu əhəmiyyətli dərəcədə artan vahid geosiyasi və geoiqtisadi regiondur. Bu qərar münasibətlərimizin dostluq və qardaşlıq xarakterini bir daha təsdiqləyir.

Prezident Əliyev çıxışında həmçinin dost və qardaş ölkələrin Qarabağın və Şərqi Zəngəzurun bərpasına verdikləri töhfələrə diqqət çəkdi. O bildirdi ki, artıq Füzuli şəhərində Mirzə Uluqbəy adına məktəb və Kurmanqazı adına Uşaq İncəsənət Mərkəzi, Ağdamda isə Manas məktəbi fəaliyyət göstərir. Bunlar özbək, qazax və qırğız qardaşlarımızın hədiyyələridir. Bu ilin oktyabrında isə Füzulidə Türkmənistanın qardaşlıq dəstəyinin rəmzinə çevriləcək məscidin təməli qoyuldu. Bütün bunlar xalqlarımızın qardaşlığının və həmrəyliyinin sübutu kimi qiymətləndirilir. Azərbaycan və Mərkəzi Asiya bu gün Şərqlə Qərb, Şimalla Cənub arasında bir körpüdür. Prezident Əliyev Orta Dəhlizin inkişafının ölkələrimiz üçün strateji əhəmiyyət daşıdığını xüsusi qeyd etdi.

Nəqliyyat və logistika infrastrukturunun müasirləşdirilməsi, gömrük prosedurlarının sinxronlaşdırılması və rəqəmsallaşdırılması üzrə birgə səylər yükdaşımaların həcminin artırılması və iqtisadi dayanıqlılığın gücləndirilməsi üçün böyük imkanlar açır. Son üç ildə Orta Dəhliz üzrə Azərbaycandan keçən yükdaşımalar 90 faiz artıb. Ələt Beynəlxalq Limanı, Bakı-Tbilisi-Qars dəmir yolu, doqquz beynəlxalq hava limanı və regionun ən böyük yük aviaşirkəti kimi amillər Azərbaycanı beynəlxalq nəqliyyat qovşağına çevirib. Həmçinin, Zəngəzur dəhlizinin tikintisi başa çatmaq üzrədir; ilkin mərhələdə 15 milyon ton yükdaşıma qabiliyyətinə malik bu dəmir yolu Orta Dəhlizin əsas arteriyasına çevriləcək. Vüqar Rəhimzadənin ümumiləşdirməsinə görə, Azərbaycan və Mərkəzi Asiya ölkələri artan strateji əhəmiyyətə malik vahid tarixi, mədəni, coğrafi və geosiyasi məkanı formalaşdırır. Xəzər dənizi bu gün xalqlarımızın strateji birliyinin, iqtisadi potensialının və tarixi əməkdaşlığının rəmzidir.