Azərbaycanda “Böyük Qayıdış” proqramının icrası uğurla davam etdirilir - Deputat

Azərbaycanda işğaldan azad edilmiş torpaqlara həyatın qaytarılması istiqamətində hazırlanan “Böyük Qayıdış” proqramının həyata keçirilməsi uğurla davam edir. Bu il ərzində köç prosesi ardıcıl və planlı şəkildə aparılıb. Milli Məclisin deputatı Afət Həsənova bildirib ki, 44 günlük Vətən müharibəsində tarixi Zəfər qazanan Azərbaycan, həmin qələbədən sonra da yeni bir tarix yazır.

Deputatın sözlərinə görə, Qarabağ və Şərqi Zəngəzurun tam azad olunması ölkə həyatında yeni və strateji bir mərhələnin başlanğıcını qoydu. Qarşıda duran əsas məqsəd bu torpaqlara həyatı geri qaytarmaq, infrastrukturun bərpası və keçmiş məcburi köçkünlərin öz doğma yurdlarına layiqli şəraitdə qayıtması idi. Azərbaycan dövləti bu işə dərhal başladı və Prezident İlham Əliyevin sərəncamı ilə "Böyük Qayıdışa dair I Dövlət Proqramı" təsdiqləndi. Bu proqram regionun yenidən qurulmasının əsas sənədidir.

Azad edilmiş ərazilərdəki bərpa və quruculuq işləri daim Prezident İlham Əliyevin şəxsi nəzarətindədir. Dövlət başçısının oktyabrın 28-də Cəbrayıla səfəri bu işlərin geniş miqyasda və sürətlə aparıldığını açıq şəkildə nümayiş etdirdi. Prezident Horovlu kəndinin birinci mərhələsinin açılışında, Cəbrayıl şəhər məscidinin təmiri işlərində iştirak etdi. Bundan başqa, Şahvəlli kəndində hər biri 50 meqavat gücündə olan "Şəms" və "Üfüq" Günəş Elektrik stansiyalarının təməli qoyuldu. Bu addımlar regionun enerji təhlükəsizliyini təmin edir.

Dövlət bu layihələri maliyyələşdirmək üçün böyük vəsait ayırır. 2020-ci ildən 2025-ci il də daxil olmaqla, dövlət büdcəsindən bərpa işlərinə ümumilikdə 22 milyard manata yaxın vəsait sərf edilib. 2026-cı ilin dövlət büdcəsində isə azad edilmiş ərazilərin bərpasına əlavə 3 milyard 500 milyon manat nəzərdə tutulur. Artıq yüzlərlə ailə doğma yurdlarına qayıdıb və onlar üçün bütün zəruri yaşayış şəraiti yaradılıb. Planlara əsasən, “Böyük Qayıdış” proqramının birinci mərhələsi 2026-cı ilin sonunadək bitəcək. Həmin müddətdə təxminən 140 min keçmiş məcburi köçkünün Qarabağ və Şərqi Zəngəzura geri dönməsi gözlənilir. Azərbaycan bütün bu nəhəng işləri tamamilə daxili resursları hesabına, kənardan maliyyə yardımı olmadan həyata keçirir.