Azərbaycanda ən çox bazar payına malik sosial şəbəkələr - SİYAHI

Bu ilin oktyabr ayında Azərbaycan istifadəçilərinin sosial şəbəkələrdəki fəallığı dəyişib. "Global Stats" Statistika Mərkəzinə görə, “İnstagram” sosial şəbəkəsi bazar payını xeyli artıraraq liderliyini gücləndirib. Platformanın fəallıq göstəricisi əvvəlki ayla müqayisədə 15,46 faiz bəndi artaraq 35,77 faizə çatıb. Bu, İnstagram-ın yerli sosial media məkanında əlçatmaz mövqeyə yüksəldiyini göstərir.

Lakin reytinqdə ikinci yerdə gələn “Facebook”un payı azalma göstərib. Hesabat ayında bu platformanın payı aylıq ifadədə 4,37 faiz bəndi azalaraq 28,33 faiz təşkil edib. Siyahıda üçüncü yeri isə “YouTube” tutur. YouTube əvvəlki ayla müqayisədə 7,16 faiz bəndi artım nümayiş etdirərək payını 20,49 faizə çatdırıb. Bu artım YouTube-un ölkədəki istifadəçi bazasında mövqeyini möhkəmləndirdiyini bildirir.

Dördüncü yerdə “Pinterest” sosial şəbəkəsi qərarlaşıb. Onun yerli bazardakı payı ötən ayla müqayisədə 0,67 faiz bəndi yüksəlib, nəticədə 7,76 faiz olub. “X” media platforması populyarlığına görə beşinci yerdədir. Onun bazar payı 5,24 faiz təşkil edib, lakin X ay ərzində kəskin şəkildə, 18,01 faiz bəndi azalıb. Reytinqdə altıncı yerdə isə 1,44 faiz göstərici ilə “Linkedin” gəlir; bu da əvvəlki ayla müqayisədə 0,84 faiz azdır. Digər sosial şəbəkələrin ümumi payı isə 1,33 faiz səviyyəsində olub.