Azərbaycanda gələn il "Rəqəmsal İnkişaf Konsepsiyası"nın icrasına 5 milyon manat xərclənə bilər

Azərbaycanın 2026-cı il dövlət büdcəsinin layihəsi rəqəmsal sahəyə və nəqliyyat infrastrukturuna ciddi vəsait yönəldilməsini nəzərdə tutur. Layihəyə əsasən, gələn il "Rəqəmsal İnkişaf Konsepsiyası"nın həyata keçirilməsi üçün 5 milyon manat vəsait planlaşdırılıb. Bu ayırma Rəqəmsal İnkişaf və Nəqliyyat Nazirliyinin (RİNN) gələcək illər üzrə strateji hədəflərini maliyyələşdirməyə yönəlib. Bu məlumatlar 2026-cı ilin büdcə zərfinin layihəsində öz əksini tapıb.

Bundan başqa, RİNN digər mühüm texnoloji strategiyaları reallaşdırmaq üçün də əlavə vəsait alacaq. Sənədə görə, "2025–2028-ci illər üçün süni intellekt Strategiyası"nın tətbiqinə 5 milyon manat ayrılacaq. İnformasiya təhlükəsizliyi sahəsində də əhəmiyyətli investisiya gözlənilir. Büdcədə "İnformasiya təhlükəsizliyi və kibertəhlükəsizliyə dair 2023-2027-ci illər üçün Strategiyası"nın icrası üçün 5,8 milyon manat vəsait nəzərdə tutulub.

Nazirliyin tabeliyindəki qurumlardan biri olan Azərbaycan Yerüstü Nəqliyyat Agentliyinə (AYNA) isə daha böyük məbləğdə vəsait proqnozlaşdırılır. Avtomobil nəqliyyatı ilə müntəzəm sərnişin daşımalarının təşkili, beynəlxalq sərnişin və yük daşımalarını tənzimləyən icazə sisteminin tətbiqi üçün 40 milyon manat vəsait ayrılacaq. Bu böyük vəsait həmçinin yeni yol nişanlarının quraşdırılması və mövcud nişanların bərpası, eyni zamanda yol hərəkətinin və piyada-yol infrastrukturunun təşkili işlərini maliyyələşdirəcək.