Azərbaycanda korporativ istiqrazlara dövlət zəmanəti veriləcək

Azərbaycanda korporativ istiqrazlara dövlət zəmanətinin verilməsi mexanizmi istifadəyə verilib. Bu yeni mexanizm sahibkarlıq subyektlərinin qiymətli kağızlar bazarında qarşılaşdığı əsas maneələrdən birini aradan qaldırmağa kömək edəcək. Bu barədə İpoteka və Kredit Zəmanət Fondunun (İKZF) Kredit Zəmanət Departamentinin direktoru Elşən Kərimov məlumat verib.

E. Kərimov bildirdi ki, Fond tərəfindən aparılan təhlillər bazarın mühüm bir problemini üzə çıxardı. Sahibkarlıq subyektləri bir çox hallarda təminatla bağlı çətinliklər yaşadığı üçün buraxdıqları istiqrazları yerləşdirə bilmirlər. Bu problem, şirkətlərin əlavə borclanma mənbələrindən istifadə etməsinə ciddi əngəl törədirdi. Bu səbəbdən istiqrazlara təminatların verilməsi mexanizmi üzərində işlərə başlanıldı və müvafiq qaydalar artıq təsdiqlənib.

Mexanizm hazırda tətbiq edilir. Direktora görə, artıq ilk sahibkarlıq subyekti ilə danışıqlar aparılır. Zəmanətlə bağlı lazımi bildiriş göndərilib və həmin subyektlə zəmanət müqaviləsi bağlanıb. O, mexanizmin mahiyyətini izah etdi: bu, bir növ əlavə borclanma üsulu olaraq formalaşdırılan məhsuldur.