Azərbaycanın 35 ildir ucalan “SƏS”i

2026-cı il yanvarın 11-i Azərbaycanın mətbuat tarixi üçün əlamətdar gündür. Həmin tarixdə ölkənin ictimai-siyasi həyatında xüsusi mövqeyi olan media orqanlarından biri, "SƏS" qəzetinin fəaliyyətə başlamasından 35 il ötür. Bu nəşr milli mətbuatımızın müstəqillik dövrü ilə yaşıddır. "SƏS" qəzeti bu müddət ərzində ölkədə baş verən siyasi, sosial və ictimai proseslərin aktiv iştirakçısı kimi çıxış edib. O, cəmiyyətin səsini ifadə edən nüfuzlu mətbuat orqanına çevrildi.

Qəzetin yaranması Azərbaycan xalqının taleyində dönüş nöqtəsi sayılan, mürəkkəb və ziddiyyətli bir dövrə təsadüf edir. XX əsrin sonlarında SSRİ-nin süqutu, milli azadlıq hərəkatının yüksəlişi, Ermənistanın Azərbaycana qarşı hərbi təcavüzü, eləcə də daxili siyasi çəkişmələr informasiya mühitini çətin sınaq qarşısında qoymuşdu. Belə bir zamanda xalqın obyektiv məlumata və müstəqil söz tribunalarına böyük ehtiyacı vardı. 1991-ci il yanvarın 11-də ilk nömrəsi işıq üzü görən "SƏS" qəzeti məhz bu tarixi zərurətdən yarandı. Qəzet fəaliyyətinin ilk illərindən etibarən müstəqil mövqeyi, cəmiyyətin aktual problemlərinə həssas yanaşması və milli maraqlara söykənən prinsipləri ilə fərqləndi. O dövrdə mətbuat üzərindəki təzyiqlərə baxmayaraq, "SƏS" öz sözünü deməyi bacardı və oxucu etimadını qazandı.

Fəaliyyətinin bütün mərhələlərində "SƏS" qəzeti dövlətçilik mövqeyinə sadiq qaldı. Milli maraqların müdafiəsi və sağlam ictimai rəyin formalaşdırılması onun əsas missiyası oldu. Qəzet ölkənin ictimai-siyasi həyatında baş verən prosesləri operativ, analitik şəkildə işıqlandırmaqla yanaşı, cəmiyyətin müxtəlif təbəqələrinin problemlərinə də tribuna rolunu oynadı. Müstəqil Azərbaycan dövlətinin formalaşması və möhkəmlənməsi prosesində "SƏS" qəzeti milli ideyaların təbliği və dövlətçilik düşüncəsinin gücləndirilməsi baxımından əhəmiyyətli yer tutub. Qəzet səhifələrində dərc olunan analitik yazılar, müsahibələr və şərhlər uzun illər ictimai fikir üçün ciddi mənbə olub. Bundan əlavə, "SƏS" qəzeti təkcə xəbər yayımı ilə kifayətlənməyərək peşəkar jurnalistlərin yetişdirilməsi baxımından da vacib rol oynayıb.

Texnologiyanın sürətlə inkişaf etdiyi müasir dövrdə "SƏS" qəzeti informasiya mühitindəki dəyişikliklərə çevik uyğunlaşdı. Ənənəvi çap mediası ilə yanaşı, qəzet onlayn platformada da aktiv fəaliyyət göstərir. Rəsmi internet saytı vasitəsilə gündəlik xəbərlər, analitik məqalələr və ictimai əhəmiyyət daşıyan materiallar geniş oxucu kütləsinə çatdırılır. Bu gün "SƏS" həm çap, həm də rəqəmsal müstəvidə işini davam etdirərək klassik jurnalistika dəyərləri ilə müasir media tələblərini uyğunlaşdırmağı bacarır. Ötən 35 il ərzində qəzet ölkənin ictimai-siyasi həyatında baş verən mühüm hadisələrin salnaməçisi kimi çıxış etdi. Qəzetin arxiv materialları müstəqillik dövrünün çətinliklərini, dövlət quruculuğu prosesini və Vətən müharibəsindəki qələbələri əks etdirir. Bu yubiley keçilmiş şərəfli yolun yekunu olmaqla yanaşı, gələcək fəaliyyət üçün yeni məsuliyyət və hədəfləri də ifadə edir.