Azərbaycanın yeniyetmə şahmatçıları Avropa çempionatında 3 medal qazanıblar

Azərbaycanın gənc şahmatçıları Monteneqronun Budva şəhərində keçirilən Avropa çempionatında böyük uğur qazandılar, ümumilikdə 3 medal - 1 qızıl, 1 gümüş və 1 bürünc əldə etdilər. Ən parlaq nəticəni 14 yaşlı oğlanların kateqoriyasında Xaqan Əhməd göstərdi. O, 7,5 xal toplayaraq birinci yeri tutdu və Avropa çempionu tituluna layiq görüldü.

Doqquz turdan sonra iki şahmatçının xalı bərabər idi. Əlavə əmsallara görə Xaqan Əhməd 116 şahmatçı arasında öz rəqibini qabaqladı. Bu möhtəbər yarışın bağlanış mərasimində qızıl medal sahibi olan Xaqan Əhmədin şərəfinə Monteneqroda Azərbaycanın Dövlət Himni səsləndirildi.

Azərbaycan komandası digər yaş kateqoriyalarında da yüksək nəticələr göstərdi. 10 yaşlı qızların yarışında Mehriban Əhmədli 9 turda 7,5 xal toplayaraq gümüş medala sahib oldu. Həmçinin, 16 yaşlı qızların birinciliyində isə Məryəm Ağaverdiyeva fərqləndi. O, 9 partiyada 7 xalla Avropa çempionatının bürünc medalını qazandı. Bu gənc idmançılar ölkəmizi beynəlxalq arenada layiqincə təmsil etdilər.

Medal qazananlardan başqa, daha iki Azərbaycan şahmatçısı yarışı ilk beşlikdə başa vurdu. 16 yaşlı oğlanların mübarizəsində Rüstəm Rüstəmov və 8 yaşlı oğlanların yarışında Kənan Babasoy yekun sıralamada 2-5-ci yerləri bölüşdülər. Ümumilikdə 1 qızıl, 1 gümüş və 1 bürünc medal qazanan Azərbaycan komandası 48 ölkə arasında 5-ci oldu. Bu turnirdə ümumilikdə 48 ölkədən 1169 şahmatçı mübarizə aparırdı.