Azərbaycanla əməkdaşlıq açıq bankçılıqda yeni imkanlar açır - Gürcüstan Banklar Assosiasiyası (MÜSAHİBƏ)

Gürcüstan Banklar Assosiasiyasının Açıq Bankçılıq layihəsinin rəhbəri Mixeil Kapanadze Bakıda keçirilən IX Beynəlxalq Bankçılıq Forumu zamanı Azərbaycanla əməkdaşlığın uzunmüddətli dostluq və açıq bankçılıq istiqamətində yeni imkanlar açdığını deyib.

O, Gürcüstan və Azərbaycan bank sektoru arasında əməkdaşlıq perspektivləri haqqında danışıb. Kapanadze qeyd edib ki, onlar Azərbaycan Banklar Assosiasiyası (ABA) ilə çox fəal işləyirlər. Bu əlaqə sadəcə əməkdaşlıq deyil, həm də uzunmüddətli dostluq əlaqəsidir. GBA ABA-nın bütün təşəbbüslərinə dəstək olur və bu dəstəyi gələcəkdə də davam etdirəcək. Qurum Azərbaycan tərəfinin təkliflərini dinləməyə hər zaman hazırdır.

Bu sahədə əməkdaşlıq sadəcə mümkün deyil, həm də arzuolunandır. Tərəflər arasında yanaşmalar və məlumatlar mübadilə edilir. Bu mübadiləyə müəyyən problemlərin necə həll olunması barədə təcrübə paylaşımı daxildir. Bu fəaliyyət çox vacibdir və onu davam etdirmək planlaşdırılır. Kapanadze yeni investisiya layihələri və maliyyə bazarındakı imkanlar barədə də məlumat verib. O, Gürcüstanda da Azərbaycanla eyni prinsiplərlə əməkdaşlıq etdiklərini vurğulayıb. Bu ölkədə fəaliyyət göstərən Azərbaycan bankları Gürcüstan Banklar Assosiasiyasının üzvləridir. Onlar digər banklarla eyni imkanlara malikdirlər. Yəni, bütün investisiyalar qarşılanır və bu sahədə yeni fürsətlərin yaranması üçün yollar açıqdır.

M. Kapanadze bank sektorunda yeni texnoloji həllərin qarşılıqlı əməkdaşlıq imkanları ilə bağlı bildirib ki, Gürcüstan Banklar Assosiasiyası ümumilikdə açıq infrastruktur istiqamətində hərəkət edir. Bu proses onilliklər ərzində bağlı olan bəzi sistemlərin artıq açılacağı deməkdir. Açıq bankçılıq bu prosesin ilk addımıdır. Ənənəvi olaraq qapalı olan ekosistemin bir hissəsi artıq açılmağa başlayıb. Gələcəkdə bu açılışın sürətini və həcmini görəcəyik. İstehlakçıların perspektivindən əsas məqsəd odur ki, bir çox məlumat və xidmətləri eyni yerdə, rahat şəkildə əldə etmək mümkün olsun. Bu yeniliklərin tətbiqi zamanı şəxsi məlumatların qorunmasına diqqət edilməli və düzgün tarazlıq tapılmalıdır.