“AzerGold” QSC-də Sudan Respublikasının ölkəmizdəki səfiri ilə görüş keçirilib (FOTO)

“AzerGold” Qapalı Səhmdar Cəmiyyətinin (QSC) İdarə Heyətinin sədri Zakir İbrahimov Sudan Respublikasının Azərbaycandakı səfiri Ənəs Eltayeb Elqaylani Mustafa ilə görüş keçirib. Bu görüşdə əsas diqqət dağ-mədən sənayesi sahəsində əməkdaşlığın genişləndirilməsi üzərində cəmləşib.

Zakir İbrahimov görüş iştirakçılarını salamladıqdan sonra, Mentorluq Proqramı çərçivəsində tədbirdə iştirak edən “Yüksəliş” müsabiqəsinin qalibləri Aslan Həsənli və Rüfət Məmmədxanlını təqdim etdi. Sədr vurğuladı ki, dövlət başçısının müvafiq sərəncamı ilə təsis edilən “Yüksəliş” müsabiqəsi ölkədə istedadlı gənclərin tapılması və idarəetmə potensiallarının inkişafı baxımından böyük əhəmiyyət daşıyır. Müsabiqə iştirakçılara bilik və bacarıqlarını qiymətləndirmək, liderlik keyfiyyətlərini təkmilləşdirmək, eləcə də peşəkar əlaqələrini genişləndirmək imkanı yaradır.

İdarə Heyətinin sədri ölkədə həyata keçirilən məqsədyönlü iqtisadi islahatlar, əlverişli investisiya mühiti və dağ-mədən sənayesinə göstərilən dövlət dəstəyi nəticəsində “AzerGold” QSC-nin ciddi nailiyyətlər əldə etdiyini bildirib. Sədr həmçinin mineral resurslarla zəngin ölkələrlə beynəlxalq əməkdaşlıq imkanlarının genişləndirilməsi üçün görülən işlərdən danışdı. Zakir İbrahimov qeyd etdi ki, Mərkəzi Asiya və Afrika regionları “AzerGold” QSC-nin strateji maraq dairəsindədir. Bu, şirkətin beynəlxalq miqyasda böyümək istəyini göstərir.

Səfir Ənəs Eltayeb Elqaylani Mustafa Sudanın Azərbaycanla müxtəlif sahələrdə, xüsusilə də dağ-mədən sənayesi sektorunda əməkdaşlığı genişləndirməkdə maraqlı olduğunu diqqətə çatdırdı. O bildirdi ki, Sudan qızıl və mis kimi zəngin filiz ehtiyatlarına və geniş ixrac potensialına malikdir. Səfir əlavə etdi ki, Sudan hökuməti bu potensialın səmərəli dəyərləndirilməsi üçün xarici tərəfdaşlarla qarşılıqlı faydalı əməkdaşlığa xüsusi önəm verir. Tərəflər bu görüşü ikitərəfli əlaqələrin inkişafı üçün müsbət bir addım kimi qiymətləndirdilər. Onlar qarşılıqlı maraq doğuran digər mövzular ətrafında da fikir mübadiləsi aparıblar.