"AzerGold" Zod qızıl yatağında genişmiqyaslı geoloji tədqiqat işləri aparır (ÖZƏL)

“AzerGold" QSC Şərqi Zəngəzur iqtisadi rayonunda yerləşən Zod qızıl yatağında genişmiqyaslı geoloji tədqiqat işləri aparır. Şirkətdən verilən məlumata görə, təkcə perspektivli sahələrin axtarışı deyil, həm də mövcud yataqlarda ehtiyatların yenidən qiymətləndirilməsi həyata keçirilir. 2025-ci ilin avqust ayından etibarən Kəlbəcər rayonunun inzibati ərazisində yerləşən bu yataqda əməliyyatlara start verilib.

Ərazinin mina və partlamamış hərbi sursatlardan mərhələli şəkildə təmizlənməsi davam etdiyi üçün əvvəllər geoloji tədqiqatlar ləng gedirdi. Buna baxmayaraq, hazırda yatağın ölkəmizin ərazisindəki hissəsində geoloji qiymətləndirmə işləri yüksək templə aparılır. Şirkət fəaliyyətini sürətləndirərək resursların dəqiqləşdirilməsinə çalışır. Bu işlərin əsas məqsədi yeni ehtiyatları aşkarlamaq və mövcud yataqların dəyərini yenidən hesablamaqdır.

Artıq yataq sahəsinin topoqrafik planalması müasir metodlardan istifadə edilərək icra edilib. Bundan əlavə, yataq filizlərinin yerüstü geokimyəvi sınaqlaşdırılması da aparılıb. Ehtiyatların qiymətləndirilməsi üçün buruq quyuları layihələndirilib və hazırda qazma işləri davam etdirilir. Bu addımlar Zod qızıl yatağında mövcud olan qalıq ehtiyatların həcmini dəqiqləşdirməyə kömək edəcək.

Növbəti mərhələlərdə isə mühəndis-geoloji, metallurji-texnoloji və hidrogeoloji tədqiqatların aparılması nəzərdə tutulur. Həmçinin, qalıq ehtiyatların hesablanması və texniki-iqtisadi əsaslandırma işlərinin həyata keçirilməsi planlaşdırılır. Şirkətdən bildirilib ki, nəticələr əldə olunduqca bu barədə ictimaiyyətə ətraflı məlumat veriləcək. Bu tədqiqatlar Azərbaycanın mineral xammal bazasının möhkəmləndirilməsi baxımından böyük əhəmiyyət daşıyır.