Bakı-Sumqayıt qatarına daş atılıb, şüşə sınıb

Dünən axşam saatlarında Bakı-Sumqayıt marşrutu üzrə hərəkət edən sərnişin qatarına hücum olub. Qatar Zabrat-Pirşağı sahəsindən keçərkən naməlum şəxslər tərəfindən daş atılıb.

Nəticədə qatarın içində sərnişinlərin olduğu 2-ci vaqonunun pəncərələrindən biri sınıb. Bu cür hərəkətlər sərnişinlərin təhlükəsizliyinə ciddi təhdid yaradır və nəqliyyat infrastrukturuna ziyan vurur. Azərbaycan Dəmir Yolları (ADY) bu hadisəni ciddi vandalizm aktı kimi qiymətləndirir.

Qeyd olunur ki, qatarlara daş atılması halları təəssüf ki, tək-tək rast gəlinən bir problem deyil. Bu ilin yanvar-sentyabr aylarında ADY-nin hərəkətdə olan qatarlarına ümumilikdə 36 dəfə daş atılıb. Şirkət bu qanunsuz və məsuliyyətsiz hərəkəti edənlərin müvafiq qaydada tapıldığını və qanunvericilik əsasında cəzalandırıldığını xatırladır.

ADY bir daha bütün vətəndaşları hamımızın sərvəti olan qatarları qorumağa çağırır. Təşkilat, təhlükəsiz səfərlərin təmin edilməsi üçün ictimaiyyəti həmrəy olmağa dəvət edir. İctimai nəqliyyata qarşı törədilən hər hansı bir hücumun qarşısı qanuni yolla alınmalıdır.