Bakıda bərpa zamanı memarlıq abidəsinə ziyan vurulub

Bakıda yerli əhəmiyyətli memarlıq abidəsi dövlət mühafizəsində olmasına baxmayaraq, təmir işləri zamanı ciddi ziyan görüb. Hadisə Bakı şəhəri, Nəsimi rayonu, Salatın Əsgərova küçəsi 213 ünvanında qeydə alınıb. Mədəni İrsin Qorunması, İnkişafı və Bərpası üzrə Dövlət Xidmətinin məlumatına görə, abidəyə zərər vuran "VEST PARK" MMC şirkətidir. Bu şirkət ərazinin yaxınlığında yeni yaşayış binası tikməyi planlaşdırırdı. Tarixi binanın zədələnmə riskini nəzərə alan Dövlət Xidməti, şirkətdən öz vəsaiti hesabına tarixi binada təmir-bərpa işləri aparmağı tələb etmişdi. Təəssüf ki, bərpa prosesi başlananda şirkət təsdiqlənmiş layihənin tələblərini kobud şəkildə pozub. Memarlıq abidəsi kimi qorunan bu binanın dam örtüyü layihədən kənar dəyişdirildi. Bu hərəkət binanın dayanıqlığı üçün əlavə təhlükə yaratdı.

Şirkət 2023-cü ilin avqustunda yeni tikinti layihəsinə baxılması üçün Dövlət Xidmətinə müraciət edib. Sentyabrın 5-də verilən cavab məktubunda yeni inşaatın tarixi abidəyə təhlükə yarada biləcəyi qeyd edilmişdi. Mümkün risklərin qarşısının alınması məqsədilə, şirkətin vəsaiti hesabına tarixi binada təmir-bərpa işləri aparılması məcburi şərt kimi irəli sürüldü. Buna uyğun olaraq, 2023-cü il 7 noyabr tarixində binanın bünövrəsinin gücləndirilməsi, fasad və dam örtüyündəki işlər üçün layihə hazırlandı. Bu layihə qanunvericiliyə uyğun olaraq Azərbaycan Milli Elmlər Akademiyası və Dövlət Şəhərsalma və Arxitektura Komitəsi ilə razılaşdırıldı, sonra Dövlət Xidməti tərəfindən təsdiq edildi. Şirkət razılaşmaya əsasən bərpa işlərinə başladı.

Təmir işləri gedişində razılaşdırılmış layihənin tələbləri pozuldu. Layihədə mövcud dam örtüyünün (ruberoid) saxlanılması nəzərdə tutulduğu halda, "VEST PARK" MMC həmin örtüyü yeni metal kirəmit tipli konstruksiya ilə əvəz etdi. Şirkət eyni zamanda damda yerləşən tüstü və havalandırma bacalarını tamamilə bağladı. Quraşdırılan əlavə konstruksiyalar binanın dayanıqlığına ciddi təhlükə yaratdığı üçün Dövlət Xidməti işləri dərhal dayandırdı. Şirkət barəsində İnzibati Xətalar Məcəlləsinin 231.2-ci maddəsi ilə protokol tərtib edildi. İş baxılması üçün Nəsimi Rayon Məhkəməsinə göndərildi. Nəsimi Rayon Məhkəməsinin 28 noyabr 2025-ci il tarixli Qərarı ilə "VEST PARK" MMC təqsirli hesab edildi.

Məhkəmə qərarından sonra şirkətdən abidənin tarixi görkəminə qaytarılması tələb olundu. Buna cavab olaraq, "VEST PARK" MMC layihədən kənar quraşdırılmış dam örtüyünü sökdü. Təəssüf ki, söküntü işləri nəticəsində dam daha da zədələndi. Nəticədə yağan yağış suları binanın içərisinə axaraq sakinlərin mənzillərinə doldu. Bu vəziyyət ciddi fəsadlar yaratdı. Hal-hazırda aidiyyəti üzrə tədbirlər görülür. Dövlət Xidməti binanın dam örtüyünün tezliklə təmir edilməsi üçün şirkətdən tələblər irəli sürəcək.