Bakıda hərbi paradda aviasiyanın çıxışları başlayıb - YENİLƏNİB-4 - CANLI

Noyabrın 8-də Bakının Azadlıq meydanında Vətən müharibəsində Qələbənin beşinci ildönümünə həsr olunmuş möhtəşəm Hərbi parad keçirilib. Tədbirdə Azərbaycan Prezidenti, Silahlı Qüvvələrin Müzəffər Ali Baş Komandanı İlham Əliyev, birinci xanım Mehriban Əliyeva, Türkiyənin Prezidenti Rəcəb Tayyib Ərdoğan və Pakistanın Baş naziri Məhəmməd Şahbaz Şərif iştirak ediblər.

Parad Azərbaycan, Türkiyə və Pakistanın Dövlət himnlərinin səsləndirilməsi ilə başlayıb. Daha sonra Ümummilli Lider Heydər Əliyevin və Vətən müharibəsi şəhidlərinin xatirəsi bir dəqiqəlik sükutla yad edilib. Azərbaycan Prezidenti paradda çıxış etməzdən əvvəl, Müdafiə naziri general-polkovnik Zakir Həsənov dövlət başçısına raport verib. Yüksək səviyyəli qonaqların çıxışları başa çatdıqdan sonra hərbçilərin parad keçidi başlayıb.

Hərbi parada Müdafiə nazirinin birinci müavini – Azərbaycan Ordusunun Baş Qərargah rəisi, "Zəfər" və "Qarabağ" ordenləri ilə təltif olunmuş general-polkovnik Kərim Vəliyev komandanlıq edib. Silahlı Qüvvələrimizin şəxsi heyəti əvvəlcə Azərbaycan Respublikasının Dövlət bayrağı altında tribunaya doğru irəliləyib. Dövlət bayrağından sonra Azərbaycan Ordusunun və hərbi əməliyyatlarda xüsusilə fərqlənən birləşmələrin Döyüş bayraqları Azadlıq meydanına gətirilib.

Hərbi texnikanın keçidi xüsusi təyinatlı avtomobil texnikası və silah sistemləri kalonu ilə başlayıb. Bu kolona "Vətən uğrunda" medalı ilə təltif olunmuş general-mayor Eldəniz Yəhyayev rəhbərlik edib. Qeyd etmək lazımdır ki, Vətən müharibəsində Qələbənin ildönümünə həsr olunmuş hərbi paradda hərbi aviasiyanın nümunəvi çıxışları da nümayiş olunub və bu, tədbirin yekunlaşan hissəsi olub.