"Barselona" "Kamp Nou"ya qayıdacaq

İspaniyanın çempionu "Barselona" futbol klubu gələn həftə öz doğma stadionu olan "Kamp Nou"ya qismən geri qayıdacaq. Komanda azarkeşlər üçün açıq məşq təşkil etməyi planlaşdırır. Xarici KİV-lərə istinadən yayılan məlumata görə, bu, stadionda aparılan yenidənqurma işləri səbəbindən uzun müddət ərzində ilk belə hadisədir.

Bu açıq məşq noyabrın 7-də baş tutacaq. Tədbirə böyük maraq gözlənilir. Məşqi izləyə biləcək tamaşaçı sayı məhdudlaşdırılıb, belə ki, arenaya cəmi 23 min tamaşaçı buraxılacaq. Azarkeşlər komandalarının hazırlıq prosesini izləmək üçün 5 və ya 10 avro dəyərində bilet almalı olacaqlar.

Xatırladaq ki, klub 2023-cü ildən bəri "Kamp Nou"da aparılan genişmiqyaslı yenidənqurma işləri səbəbindən matçlarını başqa stadionda keçirirdi. Bu qismən qayıdış stadionun tezliklə tam açılmasına doğru atılan addım kimi qiymətləndirilir. Təşkil edilən bu açıq məşq azarkeşlərə komandanı yenilənmiş arenanın bir hissəsində görmək üçün gözəl fürsət verir.