Baş nazirin müavini: Ukrayna Aİ-yə üzvlük məsələsində irəliləyişə ümid edir

Ukrayna müəyyən şərtlər daxilində dekabr ayında Avropa İttifaqına (Aİ) üzvlük məsələsində irəliləyiş əldə etməyi gözləyir. Bu barədə Ukrayna Baş nazirinin Avropa və Avro-Atlantik inteqrasiya məsələləri üzrə müavini Taras Kaçka "Politico" nəşrinə açıqlama verib. Kiyev Aİ-nin üzvlük öhdəliklərinin yerinə yetirilməsi ilə bağlı vacib saydığı altı klaster üzrə razılığın əldə ediləcəyinə ümid edir.

Kaçkanın sözlərinə görə, Aİ ölkələrinin liderləri dekabr ayında keçiriləcək görüşlər zamanı bu klasterləri müzakirə edə bilərlər. O, əgər güclü siyasi təkan verilərsə, bütün klasterlər üzərində işlərin bərpasına hazırlığın tam başa çata biləcəyini vurğulayıb. Bu halda, bütün işlər ilin sonuna qədər bağlanmış hesab edilə bilər. Ukraynalı rəsmi həmçinin Avropa İttifaqının Macarıstanın sərt mövqeyini dəf edə biləcəyinə inandığını bildirib. Kaçka, üzv dövlətlərin dekabr ayında mütləq bir həll yolu tapacağına ümid etdiyini əlavə edib.

Qeyd edək ki, Macarıstan Ukraynanın Aİ üzvlüyünə qarşı çıxan əsas dövlətlərdən biridir. Macarıstanın Baş naziri Viktor Orban daha əvvəl Ukraynanın Aİ-yə tam üzvlüyünün mümkün olmadığını söyləmişdi. Orban vurğulayıb ki, Kiyevə Aİ ilə strateji tərəfdaşlıq təklif etmək daha ədalətli razılaşma olardı. Buna baxmayaraq, Ukrayna dekabr zirvəsi zamanı Aİ rəhbərliyindən müsbət qərar çıxarılacağını gözləməyə davam edir.