Bessent: ABŞ-də şatdaun iqtisadi artıma ciddi təsir edə bilər

ABŞ-də davam edən hökumət şatdaunu ölkə iqtisadiyyatına kəskin təsir göstərmə təhlükəsi yaradır. ABŞ maliyyə naziri Skott Bessent xəbərdarlıq edib ki, əgər bu siyasi böhran qısa zamanda həll edilməsə, cari rübdə iqtisadi artım sürəti iki dəfə azala bilər.

Bessent bu proqnozu "ABC News" telekanalına verdiyi müsahibədə bildirib. Nazirin sözlərinə görə, şatdaunun mənfi təsirləri artıq prosesin ilk günündən müşahidə olunur və vəziyyət getdikcə pisləşir. O, Prezident Donald Trampın dövründə son iki rübdə ABŞ iqtisadiyyatının möhtəşəm nəticələr göstərdiyini qeyd edib. Lakin o əlavə edib ki, davamlı şatdaun bütün bu müsbət dinamikanı poza bilər.

Skott Bessent bəzi ilkin qiymətləndirmələrə əsaslanaraq, cari rübdə iqtisadi artım göstəricilərinin yarıbayarı düşəcəyini vurğulayıb. Hökumətin funksiyalarının qismən dayandırılması federal işçilərin maaş almaması və dövlət xidmətlərinin axsaması deməkdir. Bu vəziyyət birbaşa istehlak səviyyəsinə və Ümumi Daxili Məhsula (ÜDM) neqativ təsir edir. Nazir bildirir ki, ölkənin iqtisadi inkişaf sürətinin qorunması üçün bu siyasi tıxacın təcili həlli olduqca vacibdir.