Binəqədidə "Zəfərin qəhrəmanları: şəhidlər və qazilər" mövzusu müzakirə olunub

Dini Qurumlarla İş üzrə Dövlət Komitəsinin təşkilatçılığı ilə noyabrın 3-də Binəqədi rayonunda "Zəfərin qəhrəmanları: şəhidlər və qazilər" mövzusunda tədbir keçirilib. Bu yığıncaq Vətən müharibəsi şəhidlərinin xatirəsini yad etmək və zəfər qazilərinin qəhrəmanlığını önə çəkmək məqsədi daşıyırdı. Tədbirə şəhid ailələrinin üzvləri, qazilər, dövlət qurumlarının nümayəndələri, təhsil müəssisələrinin rəhbərləri və din xadimləri qatılmışdılar. Girişdə Azərbaycan Dövlət Himni səsləndirildi, sonra iştirakçılar şəhidlərin xatirəsini bir dəqiqəlik sükutla yad etdilər.

Binəqədi Rayon İcra Hakimiyyəti Aparatının İctimai-siyasi və humanitar məsələlər şöbəsinin müdir müavini-dini qurumlarla işin təşkilatçısı Elnur Məmmədov çıxış etdi. O bildirdi ki, gənclərin milli ruhda tərbiyə edilməsi dövlətin mənəvi təməllərinin güclənməsinə xidmət edir. O vurğuladı ki, şəhid ailələrinə və qazilərə göstərilən diqqət bu istiqamətdə böyük əhəmiyyət daşıyır. Natiq gənclərə səslənərək onları xalqa, dövlətə və milli-mənəvi dəyərlərə daima sadiq olmağa çağırdı. Dövlət Komitəsinin Dini məsələlər şöbəsinin müdir müavini Samir Yoldaşov isə 44 günlük Vətən müharibəsində qazanılan qələbənin Heydər Əliyevin əsasını qoyduğu güclü dövlətçilik və ordu quruculuğu siyasətinin məntiqi nəticəsi olduğunu qeyd etdi. O, Müzəffər Azərbaycan Ordusunun Prezident İlham Əliyevin rəhbərliyi ilə xalqın birliyini və milli ruhu bütün dünyaya göstərdiyini dedi.

Dövlət Komitəsinin Bakı regional bölməsinin aparıcı məsləhətçisi Rəşadət Hidayətov da çıxış edərək, Vətən müharibəsi zəfərinin xalqın birliyinin, igid övladların qəhrəmanlığının və dövlətin qüdrətinin parlaq təzahürü olduğunu bildirdi. O əlavə etdi ki, Ümummilli Lider Heydər Əliyevin müəyyənləşdirdiyi ordu quruculuğu yolu hazırda Prezident İlham Əliyevin rəhbərliyi altında ən yüksək səviyyədə davam etdirilir. Digər natiqlər – Binəqədi Ağsaqqallar Şurasının sədri Akif Rəfiyev, Qafqaz Müsəlmanları İdarəsinin qazısı Rəfail Abbasov, Vətən müharibəsi qazisi Ruslan Şıxıyev və başqaları çıxışlarında milli həmrəylik, Azərbaycançılıq ideyası və qəhrəmanlığın önəmindən danışdılar. Tədbir hissəsində lisey şagirdləri bədii hissə ilə çıxış etdilər; vətənpərvərlik ruhunda mahnılar, şeirlər səsləndirildi və milli rəqslər ifa olundu.