Birinci vitse-prezident Mehriban Əliyeva Azərbaycanın Müqəddəs Taxt-Tacdakı səfirliyinin inzibati ofisinin açılışında iştirak edib (FOTO)

Oktyabrın 17-də Azərbaycan Respublikasının Müqəddəs Taxt-Tacdakı səfirliyinin inzibati ofisi rəsmi olaraq açılıb. Bu tədbirdə Azərbaycanın Birinci vitse-prezidenti Mehriban Əliyeva və Vatikanın dövlət katibi kardinal Pietro Parolin iştirak ediblər.

Səfirliyin inzibati ofisi xüsusi əhəmiyyətli bir ərazidə yerləşir. O, Müqəddəs Pyotr Bazilikasına aparan əsas küçə olan Via Conciliazioneda, Vatikanın Apostol Sarayına çox yaxın bir məkandadır. Bu ərazidə Vatikana aid rəsmi qurumlarla yanaşı, Müqəddəs Taxt-Tacda akkreditə olunmuş bir neçə digər səfirliyin ofisləri də mövcuddur. Azərbaycanın Müqəddəs Taxt-Tacdakı səfiri İlqar Muxtarov açılış zamanı ofisin fəaliyyəti barədə məlumat verib.

Azərbaycan Respublikası ilə Müqəddəs Taxt-Tac arasındakı münasibətlər son illərdə uğurla inkişaf edir. Bu əlaqələr qarşılıqlı maraqlar, hörmət və səmərəli əməkdaşlıq ruhunda qurulur. Ölkələrimiz arasındakı işbirliyi getdikcə dərinləşir və genişlənir. Müqəddəs Taxt-Tac dünyada bir milyarddan çox katolik üçün mənəvi və ideoloji mərkəz sayılır. Bu amili nəzərə alsaq, Azərbaycanın buradakı diplomatik nümayəndəliyinin fəaliyyəti ölkəmizin həqiqətlərini dünya birliyinə çatdırmaq baxımından böyük əhəmiyyət daşıyır.

Açılış mərasimindən sonra Azərbaycanın Birinci vitse-prezidenti Mehriban Əliyeva və kardinal Pietro Parolin çay süfrəsi arxasında ikitərəfli görüş keçiriblər. Onlar bu görüşdə ikitərəfli münasibətlərə, həmçinin beynəlxalq gündəliyə və qarşılıqlı maraq doğuran digər mövzulara aid məsələlər ətrafında fikir mübadiləsi aparıblar. Azərbaycanın Müqəddəs Taxt-Tac yanında səfirliyinin rəsmi təsis edilməsi haqqında Qanun 2021-ci ildə Prezident İlham Əliyev tərəfindən imzalanıb. 2022-ci ildə isə İlqar Muxtarov ölkəmizin Müqəddəs Taxt-Tacda ilk rezident səfiri təyin edilib.