Birinci vitse-prezident Mehriban Əliyeva Vatikan Apostol Kitabxanasını ziyarət edib (FOTO)

Azərbaycan Respublikasının Birinci vitse-prezidenti Mehriban Əliyeva Vatikan Apostol Kitabxanasında olub. Bu ziyarət oktyabrın 17-də baş tutub. O, Apostol Kitabxanası və Apostol Arxivinin rəhbəri, arxiyepiskop Monsenyor Covanni Çezare Paqatzi ilə görüşüb. Paqatzi Birinci vitse-prezidentə hazırda bərpa olunan və rəqəmsallaşdırılan tarixi əlyazmalar, həmçinin tarixi mənbələr haqqında ətraflı məlumat verib.

Bu genişmiqyaslı işlər Heydər Əliyev Fondu, Azərbaycan Milli Elmlər Akademiyası, Vatikan Apostol Kitabxanası və Vatikan Apostol Arxivi arasında imzalanan Anlaşma Memorandumu çərçivəsində aparılır. Bu əməkdaşlıq mühüm tarixi və mədəniyyət əhəmiyyətinə malik əsərlərin qorunmasını nəzərdə tutur. Diqqətə çatdırılıb ki, 2013-cü və 2014-cü illərdə Heydər Əliyev Fondunun dəstəyi ilə Kitabxanada aşkar edilmiş 75 əlyazmanın bərpası və rəqəmsallaşdırılması artıq reallaşıb. Bu əlyazmalar Azərbaycanın tarixi və mədəniyyəti, xüsusilə də türkdilli irsin qorunması baxımından xüsusi əhəmiyyət daşıyır.

Vatikan Apostol Kitabxanası və Arxivi ilə qurulan bu əməkdaşlıq azərbaycanlı alim və tədqiqatçılara nadir əlyazmalara, qədim xəritələrə, eləcə də müxtəlif dillərdəki dəyərli nəşrlərə çıxış imkanı verəcək. Bu təşəbbüs gələcəkdə Azərbaycanın tarixi və mədəni irsi barədə yeni və mühüm bilgilərin əldə olunmasına şərait yaradacaq. Vatikan Apostol Kitabxanası dünyanın ən qədim və zəngin mədəniyyət ocaqlarından biridir. Onun əsası rəsmi olaraq 1475-ci ildə Papa IV Sikstus tərəfindən qoyulub. Kitabxanada tarix, din və mədəniyyətlə bağlı 80 mindən çox əlyazma, 1,6 milyondan çox kitab saxlanılır. Əsas kolleksiyalar qədim əlyazmalar, XV əsrə aid kitablar (inkunabullar), xəritələr və qravürlərdən ibarətdir.

Vatikan Apostol Arxivi isə Müqəddəs Taxt-Tacın əsrlər boyu topladığı rəsmi sənədlərin, məktubların və inzibati yazışmaların saxlandığı məkandır. Bu arxiv kilsə və dünya tarixi baxımından nadir irsi özündə birləşdirir. Əvvəllər "Gizli Vatikan Arxivi" kimi tanınan bu yerin adı 2019-cu ildə Papa Fransisk tərəfindən dəyişdirilərək Vatikan Apostol Arxivi adlandırılıb. Dünyanın ən böyük tarixi arxivlərindən sayılan bu məkanda IX əsrdən günümüzədək olan sənədlər toplanıb. Arxiv Katolik Kilsəsinin yaddaşı hesab olunur və tarixi qərarların, mövqelərin və diplomatik münasibətlərin gələcək nəsillər üçün qorunmasını təmin edir. Ziyarətin sonunda Birinci vitse-prezident Mehriban Əliyeva Apostol Kitabxanasına Azərbaycanın tarixi, təbiəti və mədəni irsinə həsr edilmiş bir sıra kitab və nəşrləri hədiyyə etdi.