"Biz bağışlamağı, əl uzatmağı bacarırıq - bu, qürur duyulası bir xüsusiyyətdir" Ayaz Salayev "Tofiq Abbasovla Dialoq" verilişində (VİDEO/FOTO)

“Baku Network” ekspert platformasında yayımlanan “Tofiq Abbasovla Dialoq” analitik video-layihəsinin yeni buraxılışının qonağı Azərbaycan Respublikasının Əməkdar incəsənət xadimi, kinoşünas, rejissor, ssenarist, pedaqoq, televiziya aparıcısı və aktyor Ayaz Salayev olub. Söhbətin əsas mövzusu Cənubi Qafqaz regionunda baş verən mühüm proseslər, o cümlədən xalqlar arasında etimadın yaradılması, tarixi illüziyalar və sülhə aparan çətin yol idi. Ayaz Salayev vurğulayıb ki, Qafqaz inkişafının yeni mərhələsinə qədəm qoyur.

Kinoşünas qeyd edib ki, region sülhə doğru irəliləsə də, ətrafda inteqrasiya prosesləri getməsinə baxmayaraq, hələ də müəyyən gərginlik ocaqları qalır. O, Azərbaycanın bu gərginliyin azalmasına nail olduğunu bildirib. Dayanıqlı sülhün əsas elementinin etimad olduğunu söyləyən Salayev, etimad olmadan nə dialoqun, nə də hər hansı nəticənin mümkün olmadığını deyib. Onun sözlərinə görə, bu, bərpa edilməsi ən çətin məsələdir. Ayaz Salayev, davamlı sülh üçün yalnız diplomatik yaxınlaşmanın yetərli olmadığını, həm də tarixin yenidən dərk olunması və keçmiş ideologiyalardan azad olunmanın zəruri olduğunu vurğulayıb.

Əməkdar incəsənət xadimi, Azərbaycanın hər zaman dözümlülük və açıqlıq nümayiş etdirdiyini diqqətə çatdırıb. Ölkədə hər kəs özünü rahat hiss edir, çünki burada istənilən dinə etiqad etmək mümkündür. Ayaz Salayev fikirlərini yekunlaşdırarkən ölkəsinin humanist xüsusiyyətlərini dilə gətirib: “Biz bağışlamağı, əl uzatmağı bacarırıq- bu, qürur duyulası bir xüsusiyyətdir”. O qeyd edib ki, sabit sülh üçün etimad və tolerantlıq həlledici rol oynayır.